कोल्हापूर / किशोर जासूद :- ए. पी. मगदूम हायस्कूल माणगावमध्ये मराठी भाषा गौरव दिन उत्साहात साजरा करण्यात आला. या निमित्ताने विविध सांस्कृतिक कार्यक्रम, गौरव गीत व नाटिका यांचे आयोजन करण्यात आले होते.
प. पू. डॉं. बापूजी साळुंखे व स्व. प्राचार्य डी. ए. पाटील यांच्या पुतळ्यास पुष्पहार अर्पण करण्यात आले. तसेच ज्ञानपीठ पुरस्कार विजेते कवी कुसुमाग्रज यांच्या प्रतिमेला पुष्पांजली अर्पण करून कार्यक्रमाची सुरुवात झाली. प्रास्ताविकेतून एस. एस. खोत यांनी कवी कुसुमाग्रज यांचे कार्य व मराठी भाषा गौरव दिन साजरा करण्यामागचा उद्देश स्पष्ट केला.
डी. एस. खोत यांनी मराठी भाषेचा गौरव कसा करावा व भाषा समृद्धीसाठी कसे प्रयत्न करावेत याविषयी मार्गदर्शन केले. संगीत शिक्षक संतोष बी. कुंभार यांनी विद्यार्थ्यांना मराठी वाचन लेखनाची गोडी कशी वाढवावी व भाषेचे संवर्धन कसे करावे याविषयी माहिती दिली. इयत्ता ५ वी अ, ६ वी अ, व ८ वी अच्या विद्यार्थिनींनी मराठी भाषा गौरव गीत व नाटिकाचे उत्कृष्टपणे सादरीकरण करण्यात आले.
कार्यक्रमाचे अध्यक्ष मुख्याध्यापक एस. वाय. काटे यांनी कवी कुसुमाग्रज यांचे जीवन कार्य व मराठी भाषेचे जतन संवर्धन, तिच्या समृद्ध साहित्य परंपरेचा गौरव कसा करावा याविषयी मौलिक मार्गदर्शन केले. शेवटी एल. एम. चौगले यांनी आभार मानले. कार्यक्रमाला सर्व शिक्षक, शिक्षकेत्तर कर्मचारी व विद्यार्थी-विद्यार्थिनी उपस्थित होते.