खालापूर / सुधीर देशमुख :- पेण तालुक्यातील उपक्रमशील शाळा म्हणून नावलौकिक प्राप्त महाराष्ट्र शासनाच्या आदिवासी विभागाच्या वतीने सुरू असलेल्या शासकीय माध्यमिक व उच्च माध्यमिक आश्रम शाळा वरसई येथे मुख्याध्यापक एस. जे. जानकर यांच्या मार्गदर्शनातून 27 फेब्रुवारी रोजी मराठी राजभाषा दिन मोठ्या उत्साहात साजरा करण्यात आला. याप्रसंगी शाळेतील विद्यार्थ्यांनी मराठी भाषा संरक्षण व संवर्धन संदर्भात विविध उपक्रमांमध्ये सहभाग घेतला.
28 फेब्रुवारी रोजी राष्ट्रीय विज्ञान दिनाचे औचित्य साधून प्रथम फाउंडेशन चिलठण खालापूरच्या वतीने विद्यार्थ्यांमध्ये वैज्ञानिक दृष्टिकोन निर्माण व्हावा, या हेतूने विज्ञान प्रदर्शनाचे आयोजन करण्यात आले होते. याप्रसंगी विद्यार्थ्यांनी 50 हून प्रतिकृतींचे सादरीकरण केले. याप्रसंगी प्रथम फाउंडेशनच्या कार्यक्रम अधिकारी जयश्री माने प्रमुख पाहुणे होत्या तर शाळेचे मुख्याध्यापक एस. जे. जानकर हे अध्यक्षस्थानी होते. या दोन्ही कार्यक्रमाच्या निमित्ताने आयोजित केलेल्या उपक्रमामुळे विद्यार्थ्यांचा आनंद द्विगुणीत झाला होता. या कार्यक्रमप्रसंगी शाळेचे अधीक्षक, शिक्षक, शिक्षकेत्तर कर्मचारी व विज्ञान केंद्र चिलठणचे सर्व सदस्य उपस्थित होते. आभार वनवे सर यांनी मानले.