* कर्जत पोलिस स्टेशनच्या पायरीवर झोपून आंदोलन
कर्जत / प्रतिनिधी :- भाजप नेते माजी आमदार सुरेश लाड यांनी कर्जत पोलिस स्टेशनच्या पायरीवर झोपून आंदोलन सुरू केले आहे. हे आंदोलन सीमाबंदीच्या कामावर आक्षेप घेत शेतकऱ्यांच्या न्यायासाठी करण्यात आले. लाड यांनी आरोप केला आहे की, कोणतेही सर्वेक्षण न करता शेतकऱ्यांना दमदाटी करून सीमाबंदीचे काम सुरू आहे. तसेच, शेतकऱ्यांना भेटून त्यांच्यावर दबाव टाकला जात असल्याचा आरोपही त्यांनी केला आहे.
या आंदोलनात सुरेश लाड यांनी कर्जत पोलिस स्टेशनचे निरीक्षक सुरेंद्र गरड यांच्या मनमानी कारभारावरही टीका केली आहे. त्यांनी विविध प्रकरणांमध्ये अधिकारांचा गैरवापर केल्याचा आरोप लाड यांनी केला आहे. त्यामुळे या अन्यायाविरोधात ते पोलिस स्टेशनच्या बाहेरच आंदोलनास बसले.
या ठिकाणी असंख्य कार्यकर्ते व सामाजिक क्षेत्रातील मान्यवर उपस्थित होते. कोणताही अनुचित प्रकार घडू नये म्हणून पोलिस उपविभागीय अधिकारी डी. डी. टेले हे ही या ठिकाणी उपस्थित होते.
* कल्पतरू प्रकल्पातील शेतकऱ्यांवर दबावाचा आरोप :-
पळसदरी येथील कल्पतरू प्रकल्पात अपंग शेतकऱ्यांवर अन्याय होत असल्याचा आरोप भाजप नेते माजी आमदार सुरेश लाड यांनी केला आहे. त्यांनी मागणी केली आहे की, कल्पतरू कंपनीने ज्या जमिनी ताब्यात घेतल्या त्याची सीमाबंदी करताना मोजणी करावी. तसेच शेतकऱ्यांना वेळ द्यावा आणि अतिक्रमण थांबवावे. विशेषतः वर्णे येथील पांडुरंग शिर्के या शेतकऱ्यावर अन्याय होत असल्याचा मुद्दा लाड यांनी उपस्थित केला आहे. शेतकऱ्यांच्या हक्कासाठी लढा सुरू ठेवण्याचा निर्धार त्यांनी या आंदोलनाच्या माध्यमातून व्यक्त केला आहे.