* महसुली अर्धन्यायिक निकाल क्यूआरकोडद्वारे नागरिकांना घरबसल्या मिळणार
खालापूर / प्रतिनिधी :- खालापुर तहसील कार्यालयात अनेक नागरिकांना आपल्या संबंधित असंख्य खटल्यांचा निकाल प्राप्त करण्यासाठी अनेक वेळा असंख्य फेऱ्या मारावे लागतात, परंतु आता या फेऱ्यांना पूर्णविराम मिळणार असून खालापूर तहसिलदार अभय चव्हाण यांनी नाविण्यपूर्ण संकल्पना राबवित महसुली अर्धन्यायिक निकाल क्यूआरकोडद्वारे नागरिकांना घरबसल्या मिळणार असल्याने तहसिलदार यांच्या उपक्रमाचे सर्व स्तरावरून कौतुक होत आहे.
ॲंड. जयेश तावडे यांनी खालापूर तहसील कार्यालयाला भेट देऊन क्यूआरकोडबाबत माहिती घेतली असता क्यूआरकोड कसा स्कॅन करावा याबाबत संबंधित विषय हाताळणारे खालापूर तहसील कार्यालयातील महसूल सहायक सारंग हेमंत राठोड यांनी माहिती सांगत अर्धन्यायिक प्रकरणात दिला जाणाऱ्या निकालाची समज या प्रतीच्या क्यूआरकोड दिला जाणार असून अर्जदार व सामनेवाला तसेच हित संबंधित व्यक्ती यांनी सदरचा क्युआरकोड आपल्या मोबाईलवरील गुगलवर जावून गुगल लेन्सद्वारे (google lens) स्कॅन करावा सदर क्यूआरकोड (QR CODE ) स्कॅन केल्यानंतर निकालाची सहीची प्रत पाहता येणार असून सदर प्रत डाऊनलोड ही करता येणार आहे. तसेच इतरांना देखील पाठवता येईल.
महसूल विभागामार्फत दिले जाणारे अर्धन्यायिक निकाल खालापूर तालुक्यात प्रथमच क्यूआरकोडच्या माध्यमातून देण्याचा नाविन्यपूर्ण निर्णय तहसीलदार अभय चव्हाण यांच्या माध्यमातून खालापूर तहसील कार्यालयात राबविला जात आहे. शासकीय कामांमध्ये अधिक पारदर्शकता क्यूआरकोडच्या निर्णयामुळे येणार असून नागरिकांना घरबसल्या निकाल मिळणार आहे.
तहसिलदार यांचा हा स्तुत्य उपक्रम वाखाण्याजोगा असल्याची प्रतिक्रिया ॲंड. जयेश तावडे यांनी व नागरिकांनी व्यक्त केली. अर्जदार व सामनेवाला यांना केवळ निकालाची समज देण्याबाबत कायद्यात व शासन निर्णयात तरतूद असल्याने निकालाची समज देताना त्या पानावर हे क्यूआरकोड असणार आहे, त्यामुळे हे क्यूआरकोड स्कॅन करून पूर्ण आदेश घरबसल्या नागरिकांना पाहता येणार आहे. सदरचे निकाल पत्र हे सहीचे असल्याने पुन्हा नकल काढण्याची आवश्यकता नाही, त्यामुळे अर्जदार - सामनेवाला व इतर संबंधित व्यक्ती यांना मोठा दिलासा मिळणार आहे. त्याचा त्यांना फायदा होणार आहे, त्यामुळे शासकीय कामात सुद्धा पारदर्शकता येवून तत्परता येणार आहे. या कार्याचे समस्त खालापूरकरांकडून मोठ्या आनंदाने स्वागत केले जात आहे. तसेच शासकीय कागदपत्रे मिळण्याकरीता जलद गतीने मिळण्याकरीता तहसिलदार अभय चव्हाण यांनी केलेल्या संकल्पनेचे नागरिकांनी कौतुक केले आहे.