अकलूज बस डेपोसाठी नवीन २० एसटी बस

* राजकुमार हिवरकर पाटील यांच्याकडून ना. भरतशेठ गोगावले यांना मागण्यांचे निवेदन

नातेपुते / प्रतिनिधी :- महाराष्ट्र राज्याचे रोजगार हमी पणन व खारभूमी मंत्री भरतशेठ गोगावले यांनी शिवसेना भवन नातेपुते येथे सदिच्छा भेट दिली. यावेळी शिवसेनेचे नेते तथा 254 माळशिरस विधानसभा शिवसेना तालुका समन्वयक राजकुमार हिवरकर पाटील यांनी ना. गोगावले यांचा शिवसेनेच्या वतीने सत्कार करून त्यांना मागण्यांचे निवेदन देण्यात आले. 

या निवेदनात अकलूज बस डेपोसाठी नवीन २० एसटी बस मिळण्याबाबत विनंती करण्यात आली. अकलूज बस डेपोच्या जुन्या झालेल्या जवळपास ४० बसेस आहेत. पूर्वी त्या शंभरवर होत्या, बसची संख्या कमी झाल्याने विद्यार्थ्यांना खेड्यागावावरून येण्यास अडचण निर्माण झालेली आहे.

महाराष्ट्राचे उपमुख्यमंत्री एकनाथ शिंदे यांची पर्यटन दर्शनवारी योजना अखंड चालू ठेवण्यासाठी बस उपलब्ध असणे अत्यंत गरजेचे आहे. शिक्षणासाठी बारामतीमध्ये जाणारे हजारो विद्यार्थी, विद्यार्थिनी एसटी बसचा वापर करतात. अपुरे असलेल्या बसच्या संख्येमुळे शिक्षण घेणे अवघड झालेले आहे. तसेच अकलूजजवळ पंढरपुर तीर्थक्षेत्र, अक्कलकोट, गोंदावले, शिर्डी, नाशिक त्रिंबकेश्वर आदी धार्मिक स्थळांना भेटी देण्यासाठी नागरिकांना बस उपलब्ध नसल्याने त्याठिकाणी जाणे शक्य होत नाही. तरी आपण या निवेदनाचा सकारात्मक विचार करून अकलूज (ता. माळशिरस) साठी नवीन २० बसेस उपलब्ध करून देण्यात याव्यात. त्यावर मंत्री भरतशेठ गोगावले यांनी सकारात्मक प्रतिसाद देत टप्प्याटप्प्याने सर्व उणीवा दूर करण्याचे आश्वासन दिले. यावेळी शिवसेनेचे व इतर मित्र पक्षाचे पदाधिकारी, कार्यकर्ते उपस्थित होते.