अकोट / मोहम्मद जुनेद :- छत्रपती शिवाजी महाराज हे केवळ महाराष्ट्राचेच नव्हे, तर संपूर्ण भारताचे प्रेरणास्थान आहेत. त्यांच्या शौर्य, धैर्य आणि सुव्यवस्थेच्या गाथा केवळ भारतातच नव्हे, तर संपूर्ण जगभर पोहोचल्या आहेत. प्रत्येक वर्षी १९ फेब्रुवारी रोजी महाराष्ट्रात आणि जगभरातील मराठी माणूस जिथे आहे, तिथे शिवजयंती मोठ्या उत्साहात साजरी केली जाते.
फिलिपिन्समध्ये वैद्यकीय शिक्षण घेणाऱ्या भारतीय विद्यार्थ्यांनी या परंपरेची सुरुवात केली आणि तब्बल सात वर्षांपासून ही परंपरा अखंडपणे सुरू आहे. यावर्षी देखील महाराष्ट्र मित्र मंडळ तसेच नावेद बेग आणि निखिल राजपूत यांच्या विशेष प्रयत्नांमुळे हा सोहळा अत्यंत भव्यदिव्य पद्धतीने संपन्न झाला. महाराष्ट्रापासून हजारो किलोमीटर दूर असलो तरीही आमच्या हृदयात छत्रपती शिवरायांविषयी असलेली निष्ठा आणि अभिमान हा उत्सव साजरा करतांना दिसून येतो.
शिवरायांनी दिलेल्या स्वाभिमान, पराक्रम आणि लोककल्याणकारी विचारांचा वारसा पुढील पिढीपर्यंत पोहोचवण्याचे कार्य आम्ही अभिमानाने करीत आहोत. इथल्या वैद्यकीय शिक्षण घेत असलेल्या प्रत्येक मराठी विद्यार्थ्यांसाठी हा दिवस केवळ उत्सव नसून आपल्या मातृभूमीशी असलेल्या अस्मितेचा आणि शिवचरित्राच्या प्रेरणेचा पुन्हा एकदा साक्षात्कार घडविणारा आहे.