माळशिरस / प्रतिनिधी :- नातेपुते नगरपंचायत हद्दीमध्ये शेतकऱ्यांच्या शेत जमिनीवर शहराच्या प्रारूप विकास आराखड्याच्या अनुषंगाने टाकलेल्या आरक्षणाबाबत नगरवासियांकडून आलेल्या हरकतींचा नगरवासीय व लोकप्रतिनिधी या सर्वांसमोर तात्काळ निर्णय घ्यावा या मागणीचे निवेदन सोलापूर सहा. संचालक नगर रचना कल्याण जाधव यांना शिवसेना नेते तथा विश्वस्त नातेपुते एज्युकेशन सोसायटी राजकुमार हिवरकर पाटील यांनी दिले आहे.
नातेपुते नगरपंचायत हद्दीतील ग्रामस्थांना, शेतकऱ्यांना विश्वासात न घेता प्रारूप विकास आराखड्याचे आरक्षण टाकल्यामुळे काही कुटुंब भूमिहीन होणार आहेत. पिढी जात कसत असलेल्या जमिनी यावरती फॉरेस्ट, ग्रामपंचायत काळापासून केलेली घरे, बांधकामे, दवाखाने यावरती विकास नगररचनेच्या नकाशात दाखविलेले रस्ते यासह विविध प्रयोजन यामुळे नागरिकांच्या उदरनिर्वाहाच्या जागा, घरे, शेतजमिनी, असलेली बांधकामे यांचा प्रश्न ऐरणीवर आला आहे. शहराच्या प्रारूप विकास आराखड्याच्या अनुषंगाने ११० हरकती नोंदविण्यात आल्या आहेत.
याबाबत नातेपुते नगरपंचायतीने केलेले ठराव सुद्धा नागरिकांना माहित नाहीत. माजी मुख्यमंत्री एकनाथ शिंदे यांनी नगरपंचायतीला विकासासाठी भरपूर निधी दिला आहे. विकासाच्या कामाबरोबरच नागरिकांच्या उदरनिर्वाहाच्या जागा, घरे, जमिनीच्या प्रश्नाबाबत नोंदविलेल्या हरकतींवर तात्काळ सुनावणी घ्यावी. सुनावणीस स्वतः उपस्थित राहून नगरवासीय व लोकप्रतिनिधी यांच्यासमोर तोडगा काढावा अशा मागणीचे निवेदन हिवरकर पाटील यांनी दिले आहे.