* जिल्हाधिकाऱ्यांनी तातडीने लक्ष द्यावे !
* जन्म-मृत्यू प्रमाणपत्राला महिनाभर वेटींग?
* नागरी सुविधा केंद्रात लांबच लांब रांगा
खोपोली / प्रतिनिधी :- गेल्या काही महिन्यापासून खोपोली नगर परिषद प्रशासनाच्या अनागोंदी कारभारामुळे नागरिक त्रस्त झाले आहेत. शहरातील नागरिक अशुद्ध व अनियमित पाणीपुरवठा, खराब रस्ते, अस्वच्छता, वाढते अतिक्रमण, पाणीपट्टी, घरपट्टी, जन्म - मृत्यू प्रमाणपत्र यासह मूलभूत अत्यावश्यक प्रमाणपत्र मिळविण्यासाठी करावी लागत असलेली कसरत अशा अनेक समस्यांमुळे हैराण झालेले असताना त्याकडे मुख्याधिकारी दुर्लक्ष करीत आहेत. न. प. प्रशासनाच्या ढिसाळ कारभारामुळे नागरिकांना मरणयातना भोगाव्या लागत आहेत. याकडे जिल्हाधिकारी साहेबांनी तातडीने लक्ष देऊन संबंधितांवर योग्य ती कारवाई करावी, अशी मागणी सर्वसामान्य मायबाप जनतेमधून होत आहे.
खोपोली नगर परिषदेचा कारभार अंधेर नगरी चौपट राजाप्रमाणे सुरू आहे. नगर परिषद प्रशासनाच्या अनागोंदी कारभारामुळे नागरिक त्रासले असून जिल्हा अधिकाऱ्यांनी तातडीने लक्ष द्यावे अशी विनंती खोपोलीकरांनी केली आहे. पाणीपट्टी, घरपट्टी भरणा, जन्म - मृत्यू प्रमाणपत्रांसह मूलभूत अत्यावश्यक प्रमाणपत्र मिळवण्यासाठी सर्वसामान्य नागरिकांना या कार्यालयात एक एक महिना चकरा माराव्या लागत असल्याचे नागरिकांमधून बोलले जात आहे. या नागरी सुविधा केंद्रात काम करणारे कोणत्या न कोणत्या संस्थेचे अध्यक्ष, लोकप्रतिनिधींच्या आशिर्वादामुळे कामाला लागल्याने 'हमको किसी का डर नहीं...कोई जोर हम पर नहीं...अपना ही राज है...अश्या भूमिकेत काम करीत असल्याचा संताप नागरिकांनी व्यक्त केला आहे. पाणीपट्टी, घरपट्टी, भरणा असो की जन्म-मृत्यू नोंदणी प्रमाणपत्र, दाखले दुरुती यासह मूलभूत अत्यावश्यक प्रमाणपत्र मिळविण्यासाठी तासन्तास रांगेत उभे रहावे लागत असून महिना-महिना चकर मारून ही दाखले दुरूस्त होत नाहीत. या संदर्भात मॅडमला विचारल्यास साईट बंद आहे...मॅडम जेवायला गेल्या आहेत...साहेब सुट्टीवर आहेत..आज होणार नाही, त्या मॅडमला समजते...मला समजत नाही, मी नवीन आहे...ऑडिट सुरू असल्यामुळे दाखले देता येत नाहीत...साईट बंद असल्यामुळे पाणीपट्टी, घरपट्टी घेता येत नाही...एक महिना लागला तर काय नवल आहे...चार-चार महिने दाखले प्रमाणपत्र मिळत नाहीत, इतका वेळ का लागतो आमचे तर सर्व कागद पुरावे आहेत असे विचारताच कोणत्या ही वरिष्ठ अधिकाऱ्यांना तक्रार करा, आम्ही घाबरत नाही..अशा भाषांचा वापर करीत नागरिकांना त्रास देत असल्याचे नागरिकांमधून बोलले जात आहे.
जन्म नोंदणीमुळे नवजात बालकाला कायमस्वरूपी ओळख मिळण्याचे दार उघडले जाते आणि मृत्यू नोंदणीमुळे अशा सर्व नोंदीपासून मुक्त होते. जन्म नोंदणी ओळख, नागरी स्थिती, वय, कुटुंबातील अवलंबित्व स्थिती आणि एखाद्या व्यक्तीसाठी विविध प्रकारचे अधिकार यासाठी कायदेशीर पुरावा प्रदान करते. जन्म नोंदणी आणि जन्म प्रमाणपत्र जारी करणे या एकमेकांशी जोडलेल्या घटना आहेत. सरकारी दस्तऐवज म्हणून जन्म प्रमाणपत्र एखाद्या व्यक्तीला राष्ट्राच्या अधिकारांचा आणि संरक्षणाचा आनंद घेण्यास समर्थन देते. मृत्यू प्रमाणपत्र त्याच्या कुटुंबातील सदस्यांना मालमत्ता अधिकार आणि पॉलिसी बेनिफिट्स आणि इतर हक्क, विशेषाधिकार यासारख्या योजनांचा आनंद घेण्यासाठी मदत करते. थोडक्यात, जन्माचा दाखला हा एखाद्या व्यक्तीच्या जगण्याचा आधार देणारा दस्तऐवज आहे आणि मृत्यूचा दाखला हा त्याच्या कुटुंबातील सदस्यांना सेवा देण्यासाठी एक दस्तऐवज आहे. जन्म प्रमाणपत्र हे नागरिकत्वाचे तिकीट मानले जाते, ज्याशिवाय एखादी व्यक्ती अधिकृतपणे अस्तित्वात नाही आणि म्हणून तिला विशेषाधिकार आणि राष्ट्रीय संरक्षणासाठी कायदेशीर प्रवेश मिळत नाही. दुसरीकडे, एखाद्या व्यक्तीला संपूर्ण सामाजिक, कायदेशीर आणि आर्थिक दायित्वातून मुक्त करण्यासाठी मृत्यू प्रमाणपत्र हा अनिवार्य पुरावा आहे. खोपोली शहरातील हॉस्पिटलमधील जन्माला येणे किंवा मृत्यू पावणे गुन्हा आहे की सजा? नगर परिषद कार्यालयामध्ये जन्म व मृत्यू दाखले मिळविण्यासाठी इतका त्रास होत असेल तर नागरिकांनी कुठे जावे ? हे नगर परिषद कार्यालय फक्त लोकप्रतिनिधीची कामे करण्यासाठी आहे का? जे लोकप्रतिनिधी जनतेने दान केलेल्या मतदानातून निवडून येतात आणि जनतेची कामे वाऱ्यावर सोडतात त्यांना जनतेनी मतदान करणे बंद केल्यावर कसे मिरविणार ?जनता मायबाप आहे आणि या कार्यालयातील लोकसेवक जनतेचे मालक नाही तर नोकर आहेत हे त्यांनी विसरू नये, अशी प्रतिक्रिया नागरिकांमधून उमटत आहे.