देवळाली प्रवरा / प्रतिनिधी :- देवळाली प्रवरा नगर परिषदेचे श्री त्रिंबकराज मोफत वाचनालयाच्या वतीने 20 ते 22 मार्च रोजी तीन दिवसीय त्रिंबकराज व्याख्यानमाला आयोजित करण्यात आलेली असून या व्याख्यानमालेचे उद्घाटन शिर्डी संस्थानचे उपाध्यक्ष, माजी आमदार चंद्रशेखर पाटील कदम यांच्या हस्ते करण्यात येणार आहे, अशी माहिती देवळाली प्रवरा नगर परिषदेचे मुख्याधिकारी विकास नवाळे यांनी दिली.
गुरूवार, 20 मार्च रोजी सायंकाळी सहा वाजता श्री समर्थ बाबुराव पाटील महाराज सांस्कृतिक भवन येथे अहिल्यानगर येथील ज्येष्ठ साहित्यिक, हास्यसम्राट फेम डॉं. संजय कळमकर यांचे "हसण्यासाठी जन्म आपुला" या विषयावर तर शुक्रवार, 21 मार्च रोजी कोल्हापूर येथील युवा व्याख्याते युवराज पाटील यांचे "जीवन सुंदर आहे" या विषयावर व्याख्यान होणार आहे.
शनिवार, 22 मार्च रोजी पुणे येथील युवा साहित्यिक, व्याख्याते सचिन पवार यांचे "संतांनी महाराष्ट्राला काय दिले" या विषयावर व्याख्यान होणार असून याच दिवशी व्याख्यानमालेचा समारोप श्रीरामपूर विधानसभा मतदारसंघाचे आमदार हेमंत ओगले यांच्या प्रमुख उपस्थितीमध्ये होत आहे. तरी या व्याख्यानमालेसाठी देवळाली प्रवरा परिसरातील सर्व नागरिक, विद्यार्थी, शिक्षक, कर्मचारी, बचत गटातील सदस्य यांनी उपस्थित राहून व्याख्यानमालेचा लाभ घ्यावा, असे आवाहन नगर परिषदेच्या वतीने करण्यात आलेले आहे.
श्री त्रिंबकराज सार्वजनिक वाचनालयाच्या वतीने प्रथमताच अशा व्याख्यानमालेचे आयोजन करण्यात आलेले असून अभ्यास करणारे विद्यार्थी व नागरिकांना याचा निश्चितच उपयोग होणार आहे, यावेळी प्रत्येक दिवशी एक शालेय विद्यार्थी आपले मनोगत व्यक्त करणार आहे. तसेच यावेळी त्रिंबकराज मोफत वाचनालयाचा लाभ घेऊन शासकीय नोकरीमध्ये यावर्षी निवड झालेल्या उमेदवारांचा सत्कार करण्यात येणार आहे.