नागोठणे / प्रतिनिधी :- नागोठणे विभाग तसेच नागोठणे येथील मुस्लिम मोहल्यातील असंख्य कार्यकर्त्यांनी शिवसेनेचे रोहा तालुका प्रमुख मनोज कुमार शिंदे यांच्या नेतृत्वाखाली बाळासाहेब ठाकरे शिवसेना पक्षामध्ये जाहिर प्रवेश केला.
यावेळी शिवसेना नेते तथा रोजगार हमी व फलोत्पादन मंत्री भरत गोगावले, शिवसेना जिल्हाप्रमुख मनोज घोसालकर, रोहा तालुका प्रमुख मनोज कुमार शिंदे, उपतालुका प्रमुख मनोज खांडेकर, विभाग प्रमुख प्रवीण ताडकर, उपविभाग प्रमुख आकाश मढवी, रोहा शहर प्रमुख संतोष चितळकर आदी उपस्थित होते.
काँग्रेसचे ज्येष्ठ कार्यकर्ते नसिम अधिकारी, भाजपाचे रोहा तालुका अल्पसंख्याक विभाग माजी अध्यक्षा फातिमा सलाम सय्यद, काँग्रेसचे अल्पसंख्याक माजी रोहा तालुका अध्यक्ष तथा पत्रकार याकुब सय्यद, काँग्रेस पक्षाचे युवा शहर अध्यक्ष फैयाज अ. रहेमान पानसरे, अजीम अहमद मुल्ला, आरपीआय पक्षाचे रोहा तालुका अध्यक्ष असगर शब्बीर सय्यद, काँग्रेस युवा कार्यकर्ते दानिश अधिकारी, काँग्रेस महिला युवा शहराध्यक्षा आफरीन दानिश अधिकारी, सज्जाद पानसरे, अजीम कुवारे, सादिक सय्यद, मुदस्सर पोत्रिक, हनीफ पठाण, समीर सय्यद, मुस्ताक सय्यद, फाहीक पानसरे, शहबाज सय्यद, रुशान पानसरे, मोजम कोरतकर, शम्मी पानसरे, मारूफ कोरतकर, वसीम कडवेकर, मंजर पठाण आदींनी रोजगार हमी व फलोत्पादन मंत्री भरत गोगावले यांच्या उपस्थितीत शिवसेना पक्षात प्रवेश केला.
नागोठणे गावामध्ये अनेक वर्षापासून प्रलंबित शुद्धीकरण पाण्याचा प्रश्न मार्गी लागलेला नसून अनेकवेळा गावकऱ्यांना शुद्ध पाणी देण्याचे आश्वासन देण्यात आले. परंतु आजपर्यंत लोकांना शुद्ध पाणी मिळालेले नाही हे दुर्दैव आहे. नागोठणे येथील मुस्लिम बांधवांनी शिवसेना पक्षावर विश्वास टाकला आहे, त्या विश्वासाला कदापी मी तडा जाऊ देणार नाही. लवकरात लवकर तमाम नागोठणेकरांना शुद्ध पाणी पाजण्याचे मी या ठिकाणी वचन देतो तसेच नागोठणे गावातील अनेक विकासात्मक काम खुंटली आहेत. ते सर्व विकासात्मक काम मी यापुढे पूर्ण करीन असे आवाहन रोजगार हमी व फलोत्पादन मंत्री भरत गोगावले यांनी दिले.
ते पुढे म्हणाले की, मोहल्यातील सामाजिक कार्यकर्ते याकूब सय्यद व त्यांच्याबरोबर शिवसेना पक्षात प्रवेश केलेल्या कार्यकर्त्यांच्या गावातील विकासात्मक कामांकरीता मी त्यांच्या सदैव पाठीशी ठामपणे उभा आहे.
शिवसेना रोहा तालुका प्रमुख मनोज कुमार शिंदे म्हणाले की, शिवसेना पक्ष नेतृत्वावर विश्वास ठेवत नागोठणे विभाग तसेच नागोठणे मोहल्यातील मुस्लिम बांधवांनी नि:स्वार्थपणे पक्षावर विश्वास दर्शवित पक्ष प्रवेश केला आहे, त्या कार्यकर्त्यांच्या पाठीशी ठामपणे उभा राहून त्या कार्यकर्त्यांच्या अडचणी समजून घेऊन त्यांच्या अडचणी दूर करण्याचे खऱ्या अर्थाने काम मी करेन. नागोठणे येथील पत्रकार राज वैशंपायन म्हणाले की, याकूब सय्यद यांचे वडील स्वर्गीय सत्तारभाई सय्यद व त्यांचे मोठे बंधू स्वर्गीय निजामभाई सय्यद यांनी नि:स्वार्थीपणे लोकोपयोगी सेवा ही राजकीय कारकिर्दीची आठवण देते. आज ती राजकीय कारकिर्द लोकांच्या स्मरणात आहे, लोकनेते म्हणून त्यांची लोकांसमोर आज देखील ओळख आहे. त्याच पद्धतीने याकूब सय्यद हे देखील पत्रकार क्षेत्रात कार्य करीत असून लोकप्रिय व्यक्तिमत्व आहेत. सामाजिक, शैक्षणिक, राजकीय क्षेत्राचा तसेच शासकीय, प्रशासकीय कार्यालयाचा त्यांना चांगला अनुभव आहे. नागोठणे पंचक्रोशीमध्ये सय्यद यांची सामाजिक कारकिर्दी गाजत आहे.
सामाजिक कार्यकर्ते याकूब सय्यद यांनी मोहल्ल्यातील कार्यकर्त्यांना आपल्याबरोबर घेऊन शिवसेना पक्षात प्रवेश करून मोहल्यात शिवसेना पक्षाची स्थापना केली आहे तसेच नागोठणे मोहल्यात राजकीय इतिहासाची नांदी रचली आहे, असेही राज वैशंपायन यांनी सांगितले.