* पंतप्रधान मातृत्व वंदना योजनेबाबत अफरातफर करण्याची प्लॅनिंग ?
* गर्भधारणा, डिलीवरी व लसीकरणाच्या तारखा बदलवून ऑनलाईनचे प्रयत्न ?
* काही आशा वर्करांचा पाठींबा तर काही आशा वर्करांचा विरोध ?
रायगड / विशेष प्रतिनिधी :- पंतप्रधान मातृत्व वंदना योजनेकडे दुर्लक्ष करण्यात आल्याने कर्जत तालुक्यात शेकडो महिला वंचित राहिल्या आहेत. दरम्यान, या प्रकरणाची सखोल चौकशी करण्यात यावी तसेच कर्जत पंचायत समितीचे गटविकास अधिकारी, तालुका आरोग्य अधिकारी, डेटा ऑपरेटर व तत्सम अधिकारी व कर्मचारी यांची चौकशी करण्यात यावी. दोषींवर कार्रवाई करण्यात यावी, अशी मागणी करीत पत्रकार राजेंद्र शिवाजी जाधव व आदिवासी समाज कार्यकर्ती सुचिता लोहोकरे यांनी आंदोलन छेडले आहे. पीएमओ कार्यालयासह मुख्यमंत्री, उपमुख्यमंत्री, महिला व बालकल्याण मंत्री, कोकण आयुक्त, जिल्हाधिकारी, प्रातांधिकारी, तहसिलदार व आरोग्य विभागाकडे त्यांनी पत्रव्यवहार केला आहे. निवेदने देण्यात आली असून या प्रकरणी वरीष्ठ अधिकारी कामाला लागले आहेत.
आगामी अर्थ संकल्पीय अधिवेशनात या संदर्भातील तारांकीत प्रश्न उपस्थित होणार आहे. दरम्यान, आता या प्रकरणी चौकशी करून दोषींवर कार्रवाई करण्यापेक्षा नवनविन आयडीया लावत प्रकरण दाबण्याचा प्रयत्न सुरू असल्याचे समजते. सूत्रांकडून मिळालेल्या माहितीनुसार ज्या महिलांना पंतप्रधान मातृत्व वंदना योजनेचा लाभ मिळालेला नाही. डेटा ऑपरेटर व तत्सम अधिकारी, कर्मचारी यांच्या चुकीमुळे वंचित राहिलेल्या 'त्या' महिलांना लाभ देण्यासाठी संबंधित महिलेची गर्भधारणेची तारीख...डिलिवरीची तारीख... बाळाची जन्म तारीख...तसेच लसीकरणाच्या तारखा बदलवून ऑनलाईन अर्ज दाखल करायचा, असा मार्ग काढण्यात आल्याची माहिती सूत्रांकडून मिळाली आहे.
या नविन आयडीयाबाबत माहिती देण्यासाठी एका बैठकीचे देखील आयोजन करण्यात आले होते, असे समजते. या बैठकीत याबाबत ऊहापोह झाल्याची माहिती मिळत आहे. परंतु या चुकीच्या, बनावट कागदपत्रे बनवून शासनाची फसवणूक करण्याच्या प्लॅनिंगला काही आशा वर्करांनी विरोध केला असल्याचे समजते. दरम्यान, याबाबत बोलतांना पत्रकार राजेंद्र जाधव म्हणाले की, माझ्या कानावर खबर आली आहे. पण यातील सत्य अजून बाहेर आलेले नाही. अशी आयडीया लावून महिलांचे अर्ज ऑनलाईन करून आपली मान वाचविण्याचा प्रयत्न सुरू आहे, पण जर चुकीच्या पध्दतीने काम झाले तर आपण शांत बसणार नाही व तालुकाभर तीव्र आंदोलन छेडू, असा इशारा न्यूज जर्नालिस्ट असोसिएशन रायगड जिल्हाध्यक्ष राजेंद्र शिवाजी जाधव यांनी दिला आहे.