* मर्जीतील अधिकाऱ्यांच्या बदल्या रोखण्यासाठी लोकप्रतिनिधी कामाला
रायगड / सुधीर माने :- देवेंद्र फडणवीस यांनी मुख्यमंत्री पदाचा कार्यभार सांभाळल्यापासून राज्यात मोठ्या प्रमाणावर आयएएस (IAS) व आयपीएस (IPS) अधिकाऱ्यांच्या बदल्या करण्यात आल्या आहेत. अनेक वरीष्ठ अधिकाऱ्यांची खांदेपालट करण्यात आली तर काही वरिष्ठ अधिकाऱ्यांचा जिल्हा बदल करण्यात आला आहे. सचिव, आयुक्त, जिल्हाधिकारी, महासंचालक आदी अधिकाऱ्यानंतर आता तहसिलदार, पोलिस अधीक्षक, डिवायएसपी, बिडीओ आदी अधिकाऱ्यांच्या देखील बदली होण्याची शक्यता वर्तविण्यात येत आहे. त्याचप्रमाणे तक्रारी प्राप्त झालेल्या अधिकाऱ्यांबद्दल ही मुख्यमंत्री देवेंद्र फडणवीस कठोर निर्णय घेणार असल्याचे समजते.
बीड, नांदेड, पुण्यानंतर रायगड जिल्ह्यातील देखील अनेक अधिकारी व कर्मचारी यांच्याबाबत राजकीय नेते, लोकप्रतिनिधी, सामाजिक कार्यकर्ते, पत्रकार व जनतेकडून तक्रारी करण्यात आल्या आहेत. दरम्यान, या तक्रारींची दखल घेवून काही वरीष्ठ अधिकाऱ्यांच्या बदल्या होणार आहेत. तशा हालचाली मंत्रालयात सुरू झाल्या असल्याचे समजते. अनेक तक्रारी प्राप्त झाल्यानंतर तालुक्यातील वरीष्ठ अधिकाऱ्याची उचलबांगडी अंतिम टप्प्यात आहे. मात्र, 40 लाखांच्या मिठाला जागत एका लोकप्रतिनिधीने बदली रद्द करण्यासाठी मंत्रालयात जोरदार मोर्चेबांधणी सुरू केली आहे. दरम्यान, बदली थांबवायची असेल तर 10 कोटी रूपयांची ऑफर संबंधितांना देण्यात आली होती. पण मोलभाव करीत सदर प्रकरणी 8 कोटींवर तडजोड झाली असून त्या दृष्टीने संबंधितांंनी धावपळ सुरू केली असल्याची माहिती विश्वसनीय सूत्रांकडून मिळत आहे.
नागरीकांची कामे पेडींग ठेवणे...शासनाचा कोट्यवधी रूपयांचा महसूल बुडू देणे...शासकीय कार्यालयातील शिस्त घालविणे...नागरीकांची हेळसांड करणे...स्वत: ला राज्यघटना व कायद्यापेक्षा मोठे समजणे...नागरीकांना धमकावणे...अरेरावी करणे...जनतेची होणारी लूट, लुबाडणूक उघड्या डोळ्यांनी पाहणे...अशी संबंधित अधिकाऱ्यांचे कार्यगौरव असतांना लोकप्रतिनिधी अशा अधिकाऱ्याची बदली होवू नये यासाठी आपले सर्वस्वपणाला लावत असल्याची माहिती सूत्रांकडून मिळत आहे. नागरीक, जनता, मतदार महत्वाचे की एक अधिकारी...नागरीकांची कामे करणारा...शासनाचा महसूल वाढविणारा...राज्य घटनेचा सन्मान करणारा अधिकारी हवा की, साहेबांची हाजी हाजी करणारा, याचा विचार लोकप्रतिनिधींनी करावा...मतदार संघाच्या विकासासाठी, तालुक्याच्या विकासासाठी प्रयत्न करणारा, नवनवीन आयडीया लावून विकासाला चालना देणारा अधिकारी मतदार संघात यायला हवा, यासाठी लोकप्रतिनिधीने प्रयत्न करणे आवश्यक आहे. पण संबंधित लोकप्रतिनिधी जोरदार मोर्चेबांधणी करीत असल्याने बदली होणार की थांबणार? याकडे संपूर्ण जिल्ह्याचे लक्ष लागले आहे.