* ग्राम दैवताच्या जागेचे पावित्र्य राखण्यासाठी आंदोलन
* भैरवनाथ ग्रामदैवत ट्रस्टचे अध्यक्ष ठाकरे यांचा इशारा
* पटेल बिल्डरवर कार्रवाई न झाल्यास तीव्र आंदोलन
कर्जत / विशेष प्रतिनिधी :- वारंवार तक्रार करूनही वांजळे येथील भैरवनाथ ग्रामदैवत ट्रस्टच्या मालकीच्या असलेल्या जागेत पटेल बिल्डरच्या गृहप्रकल्पातील सांडपाणी व शौचालयाचे दुषित, घाणेरडे, अशुध्द पाणी बंद करण्यात येत नसल्याने कुंभकर्ण झोपेत असलेल्या कर्जत तहसील व रायगड जिल्हा प्रशासन, महाराष्ट्र सरकार यांना जागे करण्यासाठी कर्जत प्रातांधिकारी कार्यालयाबाहेर 'हनुमान चालिसा' पठण आंदोलन करण्यात येईल, असा इशारा भैरवनाथ ग्रामदैवत ट्रस्टचे अध्यक्ष प्रदीप ठाकरे यांनी दिला आहे.
मुख्यमंत्री देवेंद्र फडणवीस यांना दिलेल्या निवेदनात नमूद करण्यात आले आहे की, अनमोल डेव्हलपर्स यांनी वांजळे येथील गट नं. 4 व 5 मध्ये "नेचर" नावाने गृहप्रकल्प उभारला आहे. या गृह प्रकल्पातील सांडपाणी व शौचालयातील पाण्याची कोणतीच व्यवस्था करण्यात आली नसल्याचे दिसून येते. तरी या गृह प्रकल्पातील सांडपाणी भैरवनाथ ग्रामदैवत ट्रस्टच्या जागेत सोडण्यात येत आहे. आम्ही या ठिकाणी भविष्यात मंदिर उभारण्याचे स्वप्न पाहत आहोत. आमचे मंदिर एका बिल्डरमुळे अस्वच्छ सांडपाणी साचलेल्या अस्वच्छ, नापिक जमीनीत उभे राहिल का? त्याचप्रमाणे वेळीच अस्वच्छ पाणी, सांडपाणी बंद झाले नाही तर आम्ही आमच्या देवाच्या मंदिरात अस्वच्छ, घाणेरड्या, शौचालयातील सांडपाणीतून जावे, असा प्रश्न उपस्थित करण्यात आला आहे.
आमच्या धार्मिक भावना दुखाविणाऱ्या पटेल बिल्डरसह टीपी विभागातील अधिकारी व कर्मचारी तसेच रायगड जिल्हाधिकारी, कर्जत प्रांताधिकारी, कर्जत तहसिलदार व संबंधित अधिकारी व कर्मचारी यांच्यावर कारवाई करण्यात यावी, अन्यथा आम्ही हिंदु नागरीक, समाज बांधव शांत बसणार नाहीत. वांजळे गावासह संपूर्ण कर्जत तालुक्यात तीव्र आंदोलन छेडू. गरज पडल्यास आम्ही आमच्या धार्मिक भावना दुखाविणाऱ्या बिल्डर व शासकीय अधिकारी-कर्मचारी यांना धडा शिकविण्यास मागे-पुढे पाहणार नाही. आमच्या धर्माचा...आमच्या देव-देवतांचा अपमान रोखण्यासाठी आम्हाला जीव द्यावा लागला तरी आम्ही मागे हटणार नाही व उद्या आमच्या हातून धर्माची, धार्मिक स्थळाची, ग्राम दैवतची रक्षा करताना अघटीत घडले तर त्याला आपल्यासह संपूर्ण प्रशासन व रायगड जिल्ह्यातील सर्व संबंधित अधिकारी व कर्मचारी जबाबदार राहतील, असा इशारा देखील भैरवनाथ ग्रामदैवत ट्रस्टचे अध्यक्ष प्रदीप ठाकरे यांनी दिला आहे.