माळशिरस / प्रतिनिधी :- डोंबाळवाडी (कु) येथील मेजर बापूराव सोपान रुपनवर हे गेली 22 वर्ष भारतीय सैन्य दलात सेवेन्टी आर्मड् रेंजिमेंट या विभागात देशसेवा करीत होते. ते ज्या वेळी सैन्यात भरती झाले, त्यावेळी घरची परिस्थिती खूप प्रतिकुल होती. आईवडील सामान्य शेतकरी कुटुंबातील असल्याने शेती व्यतिरिक्त मजुरी करून कुटुंबाचे पालन पोषण करीत होते. मेजर बापूराव व त्यांचे मोठे बंधू आप्पासो रुपनवर हे देखील आपल्या आईवडिलांना शेतीच्या कामात साथ देऊ लागले. हे करत असतानाच मेजर बापूराव यांनी सैन्य दलाची भरतीची परीक्षा दिली व ते पास झाले. दि. 29 जानेवारी 2003 साली ते अहिल्यानगर (अहमदनगर) या ठिकाणी ट्रेनिंगसाठी गेले. अतिशय खडतर ट्रेनिंग पूर्ण करून त्यांचे पाहिले पोस्टिंग पठाणकोटसारख्या दुर्गम व खतरनाक भागात झाले. परंतु देशसेवा व कुटुंबाची असलेली जबाबदारी डोळ्यांसमोर ठेऊन कोणत्याही प्रकारची भीती न बाळगता कितीही दुर्गम भाग असला तरी देशसेवेला प्राधान्य दिले. त्यांनी पंजाब, राजस्थान, काश्मीर, हरियाणा अशा देशातील अनेक भागात रणगाडा चालक म्हणून आपली सेवा दिली.
31 जानेवारी 2025 रोजी सेवेची 22 वर्ष पूर्ण करून त्यांना सैन्य दलातून सेवानिवृत्ती भेटली. त्याचनिमित्ताने त्यांचे पंचक्रोशीतील ग्रामस्थांच्या वतीने डीजे, फाटक्यांची आतिषबाजी, फुलांची उधळण करून मोठ्या जल्लोषात जंगी स्वागत करण्यात आले. त्यांच्या स्वागताला तालुक्याच्या पश्चिम भागातील सर्व आजी, माजी सैनिक मोठ्या संख्येने उपस्थित होते. मिरवणुकीनंतर रुपनवर वस्ती नंबर दोन येथे भव्य सत्कार समारंभाचे आयोजन करण्यात आले होते.
यावेळी मेजर बापूराव व त्यांच्या सौभाग्यवती रुपाली रुपनवर यांचा नागरी सत्कार कृषी उत्पन्न बाजार समिती अकलूजचे सभापती मदनसिंह मोहिते पाटील तसेच विधान परिषदेचे माजी आमदार रामहरी रुपनवर (आप्पा) यांच्या हस्ते करण्यात आला. यावेळी सोलापूर जिल्हा त्रिदल शक्ती सेनेचे जिल्हाध्यक्ष व माजी सैनिक मेजर आढाव यांनी आपल्या मनोगतातून सैनिकांचे जीवन कसे असते, त्यांना कोणत्या गोष्टीचा सामना करावा लागतो ? हे मांडले. त्यानंतर आमदार रामहरी रुपनवर यांनी भारतीय सैन्यातील अनेक गोष्टी समाजासमोर व्यक्त केल्या. भारतीय सैनिकांचे महत्व पटवून दिले व भारतीय सैनिक हा शिस्तप्रिय व्यक्ती असल्यामुळे त्यांच्याकडे समाजाचे नेतृत्व करण्याची सुद्धा कला असते असे सांगितले. मदन दादा यांनी अध्यक्षीय भाषणात मेजर बापूराव यांना भावी आयुष्यासाठी शुभेच्छा दिल्या व देशसेवा करण्यासाठी जास्तीत जास्त लोकांनी तयारी दाखवली पाहिजे असे आवाहन केले.
यावेळी व्यासपीठावर कृषी उत्पन्न बाजार समितीचे संचालक आप्पासाहेब रुपनवर पाटील, गावचे पोलिस पाटील रुपनवर पाटील, श्रीनाथ मंदिर ट्रस्टचे अध्यक्ष गणेश रुपनवर पाटील, सरपंच सचिन आगवणे, चेअरमन विठ्ठल शिपकूले, ग्रामपंचायत सदस्य, सोसायटीचे सदस्य व महिला-पुरुष मोठ्या संख्येने उपस्थित होते. या कार्यक्रमाचे सूत्रसंचालन शरद रुपनवर यांनी केले तर आभार बाजीराव चोपडे यांनी मानले.