* केंद्रीय राज्यमंत्री रामदास आठवले : देशभरातील दलितांच्या राजकीय चळवळीचे आरपीआय हेच मातृस्थान
मुंबई-हैद्राबाद / प्रतिनिधी :- भारतीय राज्यघटनेचे शिल्पकार महामानव डॉं. बाबासाहेब आंबेडकर यांच्या संकल्पनेतुन स्थापन झालेला रिपब्लिकन पार्टी ऑफ इंडिया हा पक्ष देशभरातील दलितांच्या राजकीय चळवळीचे मातृस्थान आहे. डॉं. बाबासाहेब आंबेडकरांनी स्थापन केलेली आरपीआय हीच आमची माय आहे. त्यामुळे शरीरात रक्ताचा शेवटचा थेंब असेपर्यंत आम्ही देशभरात रिपब्लिकन पक्ष मजबूत करीत राहू, असा निर्धार रिपब्लिकन पक्षाचे राष्ट्रीय अध्यक्ष तथा केंद्रीय सामाजिक न्याय राज्यमंत्री रामदास आठवले यांनी केला.
महामानव डॉं. बाबासाहेब आंबेडकरांच्या संकल्पनेतील, संविधानातील समतावादी भारत साकारण्याचा संकल्प करणारी जाहीर सभा रिपब्लिकन पक्षाच्या खिश्चन आघाडीतर्फे आयोजित करण्यात आली होती. त्यात प्रमुख मार्गदर्शक म्हणून ना. रामदास आठवले बोलत होते. यावेळी कार्यक्रमाचे आयोजक खिश्चन आघाडीचे प्रमुख जॉन मसकु, परमशिवा नागेश्वरराव गौंड, ब्रम्हामानंद रेड्डी, कोमपल्ली प्रभुदास, तेलंगणाचे अध्यक्ष रवि पसुला, गोरखसिंग, रत्नप्रसाद, स्नेहलता, रोजाराणी, पुष्पा गंगा लता आदी उपस्थित होते. विविध समाजातील लोकांनी याप्रसंगी रिपब्लिकन पक्षात प्रवेश केला.
महामानव डॉं. बाबासाहेब आंबेडकरांनी देशाला दिलेले संविधान हे परिपूर्ण आणि जगातील सर्वश्रेष्ठ संविधान आहे. डॉं. बाबासाहेब आंबेडकरांनी या देशात संसदीय लोकशाही मजबुतीने उभी केली आहे. जगातील सर्वात मोठी संसदीय लोकशाही भारत देशात नांदत आहे. डॉं. बाबासाहेब आंबेडकरांच्या अपार ज्ञानामुळे भारतात संसदीय लोकशाही यशस्वी झाली आहे, असे प्रतिपादन यावेळी ना. रामदास आठवले यांनी केले.रिपब्लिकन पक्ष महामानव डॉं. बाबासाहेब आंबेडकरांची निशाणी आहे. डॉं. बाबासाहेब आंबेडकरांच्या संकल्पनेतून रिपब्लिकन पक्ष साकार झालेला आहे. रिपब्लिकन पक्ष देशाच्या कानाकोपऱ्यात आम्ही पोहोचवत आहोत. सर्व जाती-धर्मियांना रिपब्लिकन पक्षाच्या माध्यमातून आम्ही जोडत आहोत. रिपब्लिकन पक्षावर आम्ही आमच्या आईप्रमाणे प्रेम करीत आहोत. या देशातील दलित, अल्पसंख्याकांचे प्रश्न सोडविण्यासाठी या देशातील जनता रिपब्लिकन पक्षावर पूर्ण विश्वास टाकेल. एक दिवस रिपब्लिकन पक्षाची या देशावर सत्ता येईल. त्यादृष्टीने रिपब्लिकन कार्यकर्त्यांनी काम करावे, असा बुलंद विश्वास ना. रामदास आठवले यांनी व्यक्त केला.