नातेपुते / प्रतिनिधी :- नातेपुते (सोलापूर) या ठिकाणी प्रारूप विकास आराखड्याविरोधात जनआंदोलन झाले. त्यात जनतेवर नातेपुते नगर पंचायतने लादलेला प्रारूप विकास आराखड्याविरोधात जनतेतून तीव्र प्रतिक्रिया उमटल्या. नागरिकांच्या समस्या या आंदोलनातून स्पष्ट झाल्या. नातेपुते ग्रामपंचायतीचे रूपांतर नगर पंचायतमध्ये झाल्यानंतर नातेपुते गावाचा प्रारूप विकास आराखडा नातेपुते नगरपंचायतचे मुख्याधिकारी, नगरसेवक यांनी तयार केला. जनतेला विश्वासात न घेता तयार केला असा जनतेने प्रश्न उपस्थित केला आहे. यावेळी नातेपुते गावातील अनेक नागरिकांनी तसेच महिलांनी आपल्या तीव्र प्रतिक्रिया मनोगतातुन व्यक्त केल्या. यावेळी मा. आ. राम सातपुते यांनी सांगितले की, जनतेच्या घरावरून जे आरक्षण टाकलेले आहे ते होऊ देणार नाही, जनतेवर अन्याय होणार नाही. मुख्यमंत्री देवेंद्र फडणवीस यांच्याकडे या प्रारूप विकास आराखड्यासंदर्भात चर्चा करणार असल्याचे त्यांनी सांगितले.
राजकुमार हिवरकर पाटील यांनी पुढाकार घेऊन प्रारूप विकास आराखड्याच्या विरोधात आवाज उठविला. ते म्हणाले की, हा आराखडा जो तयार केला गेला तो जनतेवर लादला गेला असून हा आराखडा रद्द न करता कलम 28 पोट नियम 4 प्रमाणे बदल अहवाल तयार करावा. तसेच लोकांना प्रारूप विकास आराखड्यासंबंधी हरकती घेता आल्या नसल्यामुळे नगरविकास खात्याकडे पाठपुरावा करून हरकती घेण्यास सांगितले. तसेच बाधित असलेल्या जनतेसाठी मी सतत लढत राहील, त्यांच्यावर होत असलेल्या अन्यायाला लढा देण्यासाठी जीवाचे रान करीन. उपमुख्यमंत्री तथा नगर विकास मंत्री एकनाथ शिंदे यांच्याकडे प्रारूप विकास आराखड्याबाबत आवाज उठविणार आहे असेही सांगितले. यावेळी अक्षय भांड बोलताना म्हणाले की, जोपर्यंत जनतेवर लादलेला आराखडा बदल केला जात नाही तोपर्यंत शासन दरबारी पाठपुरावा करणार. यावेळी नातेपुते नगरपंचायतचे नगरसेवक बी. वाय.राऊत, दादा उराडे, हेमंत उराडे, रावसाहेब पांढरे, राजू पांढरे, किशोर आबा पलंगे, बाबा बोडरे, उत्तम बरडकर, वर्धमान दोशी, सीमंदर दोशी, महावीर दोशी व नातेपुते पंचक्रोशीतील नागरिक मोठ्या संख्येने उपस्थित होते.