* जिजाऊ फाउंडेशनच्या अध्यक्षा पुजाताई सुर्वे यांची उपस्थिती
कर्जत / नरेश जाधव :- शुक्रवार, 3 जानेवारी 2025 रोजी रायगड जिल्हा परिषद शाळा वरणे येथे क्रांतीज्योती सावित्रीबाई फुले यांची जयंती मोठ्या उत्साहात साजरी करण्यात आली. या कार्यक्रमासाठी जिजाऊ फाउंडेशनच्या अध्यक्षा पुजाताई सुर्वे, कांचनताई देशमुख, सुवर्णाताई सुर्वे, अंगणवाडी शिक्षिका छायाताई देशमुख, सेवा सहयोग संस्थेच्या शिक्षिका प्रतिक्षाताई देशमुख तसेच वरणे गावातील वाडीतील महिला, तिघर गावातील महिला मोठ्या संख्येने उपस्थित होत्या.
पुजाताई सुर्वे यांनी कार्यक्रमाचे अध्यक्षस्थान स्विकारले. कार्यक्रमाचे प्रास्ताविक व सूत्रसंचालन वरणे शाळेच्या मुख्याध्यापिका छाया जाधव यांनी केले. मान्यवरांचे स्वागत शेवंता सांबरी यांनी केले. वरणे शाळेच्या विद्यार्थ्यांनी सावित्रीबाई फुले यांच्या जयंतीनिमित्त मनोगत व्यक्त केले. संस्कृती देशमुख हिने जोतिबा फुले यांच्या भूमिकेत सावित्रीबाई फुले यांच्या जीवनातील प्रसंग कथन केले. नंदिता यादव हिने सावित्रीबाई फुले यांची भूमिका साकारून यांच्या कार्याविषयी माहिती दिली. छाया जाधव यांनी आपल्या मनोगतात सावित्रीबाई फुले यांचे जीवनकार्य सांगितले तसेच पुजाताई सुर्वे शाळेत दरवर्षी बालिका दिन उत्साहात साजरा करतात, मुलांच्या विविध स्पर्धा घेऊन त्यांना बक्षीस देतात, त्यामुळे मुलांना प्रोत्साहन मिळते त्याबद्दल त्यांना धन्यवाद दिले. मुलांच्या प्रगतीसाठी पुजाताई नेहमीच प्रयत्नशील असतात यापुढेही त्यांनी असेच सहकार्य करावे ही अपेक्षा जाधव मॅडम यांनी व्यक्त केली.
तद्नंतर कार्यक्रमाच्या अध्यक्षा पुजाताई सुर्वे यांनी मार्गदर्शन पर भाषण केले. या मुलांमधूनच भावी जोतिबा फुले व भावी सावित्रीबाई फुले तयार होतील. त्यांना समाजसेवेची आवड निर्माण करणे, त्यांच्यावर चांगले संस्कार करणे ही आपणा सर्वांची जबाबदारी आहे, असे मत त्यांनी व्यक्त केले. त्यानंतर सांबरी मॅडम यांनी सर्व उपस्थितांचे आभार मानले. सर्व उपस्थितांना पुजाताई सुर्वे यांच्यातर्फे खाऊ देऊन कार्यक्रमाचा शेवट गोड करण्यात आला.