खोपोली / प्रतिनिधी :- रायगड जिल्हा पोलिस दलातर्फे भारतीय प्रजासत्ताक दिनानिमित्त "दृश्यशक्ती ट्रस्टच्या" दिव्यांग कलाकारांनी देशभक्तीपर गीत आणि नृत्याचा कार्यक्रम सादर करून प्रेक्षकांची वाहवा मिळवली. खोपोली शहरातील लायन्स क्लब सभागृहात आयोजित केलेल्या भव्यदिव्य कार्यक्रमात शेकडो प्रेक्षकांनी दिव्यांग कलाकारांनी सादर केलेल्या कलागुणांना मनसोक्त दाद दिली. गणेश वंदनेने सुरुवात झालेल्या कार्यक्रमाची "ए मेरे वतन के लोगो" या सुमधुर गीताने सांगता झाली.
प्रथम वर्ग न्यायाधीश खालापूर राजेश खंदारे, पोलिस अधीक्षक रायगड सोमनाथ घार्गे, खालापूर उपविभागीय पोलिस अधिकारी विक्रम कदम, लायन्स क्लब ऑफ खोपोलीचे अध्यक्ष दीपेंद्र बदोरिया, शॉलम एज्युकेशन ट्रस्टच्या श्रीमती पाटणकर यांच्या प्रमुख उपस्थितीत खालापूर तालुक्यातील खोपोली पोलिस स्टेशनचे पोलिस निरीक्षक शितल राऊत, खालापूर पोलिस स्टेशनचे पोलिस निरीक्षक सचिन पवार आणि रसायनी पोलिस स्टेशनचे पोलिस निरीक्षक संजय बांगर यांनी या कार्यक्रमाच्या आयोजनात महत्त्वाची भूमिका बजावली. खोपोली शहरातूनच नव्हे तर संपूर्ण रायगडातून पोलिस अधिकारी त्याचप्रमाणे अनेक मान्यवर संस्था आणि रसिकांनी या कार्यक्रमाला हजेरी लावली होती.
दृश्यशक्ती ट्रस्ट संस्थापक अध्यक्ष गीता पोडवाल यांच्या मार्गदर्शनाखाली "हम किसी से कम नही" या रंगारंग कार्यक्रमाची मांडणी केली होती. दिव्यांग कलाकारांच्या कलागुणांच्या अविस्मरणीय सादरीकरणाने अक्षरशः डोळ्याचे पारणे फिटले, अशी प्रतिक्रिया व्यक्त होत होती. कार्यक्रमाचे प्रास्ताविक डिवायएसपी विक्रम कदम यांनी केले तर सूत्रसंचालकाची भूमिका जगदीश मरागजे यांनी पार पाडली. या अविस्मरणीय कार्यक्रमानंतर रायगड जिल्हा पोलिस दलातर्फे दृश्यशक्ती ट्रस्टला रू. 225000/- आणि शॉलम एज्युकेशन ट्रस्टला रू. 25000/- देणगी स्वरूपात देण्यात आले.