* दोन महिने उलटूनही एसडीओंचे पत्र खालापूर तहसीदारांना मिळेना ?
* निवासी नायब तहसीलदार यांची विभागीय चौकशी गुलदस्त्यात ?
* आरएनटी राठोड यांची चौकशी करण्यास दिरंगाई का? - सुधीर माने
खालापूर / खलील सुर्वे :- खालापूरचे निवासी नायब तहसीलदार सुधाकर राठोड यांची विभागीय चौकशी करण्यात यावी, अशी मागणी युनायटेड जर्नालिस्ट फोरमचे रायगड जिल्हाध्यक्ष तथा साप्ताहीक खालापूर वार्ताचे संपादक सुधीर गोविंद माने यांनी दि. १० ऑक्टोबर २०२४ रोजी मुख्यमंत्री, कोकण आयुक्त, रायगड जिल्हाधिकारी, उपविभागीय अधिकारी कर्जत (प्रातांधिकारी) यांच्याकडे लेखी स्वरूपात केली होती. त्यांच्या या तक्रारी अर्जाची दखल घेवून उपविभागीय अधिकारी यांच्याकडून ३० ऑक्टोबर २०२४ रोजी खालापूरचे तहसीलदार यांना कार्रवाई करण्याबाबत पत्र काढण्यात आले होते. पत्रात नमूद करण्यात आले होते की, अर्जात नमूद केलेल्या विषयाच्या अनुषंगाने आपल्या स्तरावर चौकशी करून व आवश्यक ती नियमोचित कार्यवाही करून कार्यवाहीबाबत संबंधितास कळविण्यात यावे व तसा अहवाल या कार्यालयास सादर करावा. मात्र, कर्जत उपविभागीय अधिकारी प्रकाश संकपाळ यांच्या आदेशाला खालापूर तहसिलदार अभय चव्हाण यांच्याकडून केराची टोपली दाखविण्यात आली असल्याचे दिसून येत आहे.
तक्रारी अर्जाला दोन महिने उलटून ही कार्यवाही का करण्यात आली नाही याची माहिती घेण्यासाठी पत्रकार सुधीर माने उपविभागीय कार्यालय कर्जत येथे नायब तहसीदार पवार यांना भेटले असता पवार यांनी माहिती देतांना सांगितले की, आम्ही खालापूरचे तहसीलदार यांना दि. ३० ऑक्टोबर २०२४ रोजी आपल्या स्तरावर कार्यवाही करून त्याचा अहवाल या कार्यालयास सादर करावा, असे पत्र दिलेले आहे. आपण ते पत्र आमच्या कर्मचाऱ्यांकडून बघून घ्या... दरम्यान, पत्रकार सुधीर माने यांना सदर पत्र दाखविण्यात आले.
उपविभागीय अधिकारी प्रकाश संकपाळ यांचे पत्र पाठविण्यात आल्यानंतरही कार्यवाही का करण्यात आली नाही, याची माहिती जाणून घेण्यासाठी दि. ३१ डिसेंबर २०२४ रोजी खालापूरचे तहसीलदार अभय चव्हाण यांची पत्रकार सुधीर माने यांनी कार्यालयात भेट घेवून राठोड यांच्या विभागीय चौकशीबाबत माहिती विचारली असता तसेच उपविभागीय अधिकारी यांनी चौकशीसाठी पाठविलेल्या पत्रावर कोणती कार्यवाही करण्यात आली, या संदर्भात माहिती विचारली असता तहसीलदार अभय चव्हाण यांनी माहिती देताना सांगितले की, मला अद्याप हे पत्र मिळालेले नाही.
दरम्यान, कर्जत उपविभागीय अधिकारी प्रकाश संकपाळ यांचे कार्यालय 20 मिनिटांच्या अंतरावर असताना सुध्दा त्यांचे पत्र खालापूर तहसील कार्यालयालात पोहचत नाही. खालापूर तहसीलदार यांना सदर पत्र मिळत नाही, नेमके गौडबंगाल काय आहे? असा प्रश्न उपस्थित होत आहे. दोन महिने उलटूनही तहसीलदार यांना पत्र न भेटावे...तहसिलदार यांनी सदर पत्रावर कार्यवाही करू नये, यासाठी कोण जीव तोड प्रयत्न करीत आहे? उंदराला मांजर तर साक्षी नाही ना ? असा प्रश्न पत्रकार सुधीर माने यांनी उपस्थित केला आहे. दोन महिने उलटूनही तहसीलदार अभय चव्हाण यांना पत्र मिळालेले नाही याची देखील सखोल चौकशी वरिष्ठ अधिकाऱ्यांनी करावी, अशी मागणी देखील पत्रकार सुधीर माने यांनी केली आहे.