कर्जत / नरेश जाधव :- नेरळ पोलिस ठाण्याच्या ह‌द्दीत दि. १४ नोव्हेंबर २०२४ रोजी दुपारी १२ ते १७ वाजेदरम्यान नेरळ येथील पियुष अपार्टमेंट या बिल्डींगचे रूम नं. २०१ मध्ये राहणारे शिक्षक संतोष हिंमतराव कोळी यांच्या रूमच्या दरवाजाला असलेला लॉक कोणीतरी अज्ञात चोरट्याने तोडून घरात घुसून घरातील बेडरूममधील लोखंडी कपाटाचे आतील लॉकर कशाने तरी वाकवून त्यामधील एकूण ५,०१,०००/- रूपये अंदाजित किंमतीचे सोन्याचे दागिने व रोख रक्कम असा ऐवज घरफोडी चोरी करून चोरून नेले होते. याबाबत फिर्यादी यांनी नेरळ पोलिस ठाण्यात तक्रार दिल्याने ती नेरळ पोलिस ठाणे गुन्हा रजि.नं. २३०/२०२४ भारतीय न्याय संहिता कलम ३०५ (अ), ३३१(३), ३१७ (४) प्रमाणे गुन्हा १४ नोव्हेंबर २०२४ रोजी २१.०१ वाजता दाखल करण्यात आलेला आहे.
नमुद गुन्हयाचे तपासाचे अनुषंगाने नेरळ पोलिस ठाण्याचे प्रभारी अधिकारी यांच्या मार्गदर्शनाखाली गुन्हे प्रकटीकरण पथकातील अधिकारी व अंमलदार यांनी नमुद गुन्हयाचे आजूबाजूस व जाण्या-येण्याचे मार्गांवरील ४० ते ५० सीसीटीव्ही फुटेज तपासले. त्यांनी केलेल्या अथक प्रयत्नामध्ये त्यांना यश येवून गुन्हयातील आरोपी हा भिवंडी येथील राहणारा असल्याचे गुन्हे प्रकटीकरण पथकाला समजल्याने त्यांनी अतिशय कष्टपूर्वक, कौशल्याने तांत्रिक तपास व गोपनीय माहिती काढून शफिक उर्फ टोपी अब्दुल शेख (वय ४६ वर्षे) रा. धर नं. ३०२, काप तलावाच्या बाजूला, क्वार्टर गेटचे मागे, घुंगटनगर, ता. भिवंडी, जि. ठाणे यास ४ डिसेंबर २०२४ रोजी १.१४ वाजता अटक करण्यात आलेली असून त्याने गुन्हयातील काही मुद्देमाल रमेश गोपाल सोनी (वय ३६ वर्षे) रा. रूम नं. २०४, चंद्रेश मंदिर, काळूबाई चौक, डोंबीवली पूर्व, जि. ठाणे याला विक्री केले असल्याचे समजल्याने त्यास ६ डिसेंबर २०२४ रोजी ४.१५ वाजता अटक करण्यात आलेली असून आरोपीकडून आतापर्यंत १,२९,७००/- रूपये किंमतीचे २६.२०० ग्रॅम वजनाचे सोन्याचे दागिने हस्तगत करण्यात आलेले आहे. नमुद दोन्ही आरोपी याची गुन्हेगारी पार्श्वभूमी तपासली असता आरोपी शफिक उर्फ टोपी अब्दुल शेख याच्याविरूध्द यापूर्वी १८ घरफोडी चोरीचे गुन्हे व रमेश गापोल सोनी याच्यावर ६ चोरीचे, मालमत्ता घेण्याचे गुन्हे दाखल आहेत.
या घरफोडीचे गुन्हे उघडकीस आणण्याकरीता व मालमत्ता हस्तगत करण्याकरीता पोलिस अधीक्षक सोमनाथ घार्गे, अपर पोलिस अधीक्षक अभिजीत शिवथरे, उपविभागीय पोलिस अधिकारी डी. डी. टेळे व नेरळ पोलिस ठाण्याचे प्रभारी अधिकारी शिवाजी ढवळे यांच्या मार्गदर्शनाखाली गुन्हे प्रकटीकरण पथकाचे परी. पोलिस उपनिरीक्षक संदिप फड, पोहवा सचिन वाघमारे, पोशि राजेभाऊ केकाण, पोशि अनुया बेंद्रे, पोशि निरंजन दवणे, पोशि विनोद वांगणेकर यांनी उत्कृष्ट कामगिरी केलेली आहे.