* संभाजी ब्रिगेडने धरणे आंदोलन करून लढाईला केली सुरुवात
* लढा आणखी तीव्र करणार - इंजि. तुषार उमाळे
वर्धा / रुपेश संत :- शासनाने वर्धा जिल्ह्याला शासकीय वैद्यकीय महाविद्यालय देण्याचे योजले आहे. त्याकरिता सदर महाविद्यालय व जोडीला येत असलेले रुग्णालय वर्धा शहर लगत असलेल्या साटोडा येथे उभारण्याचा प्रस्ताव शासनाच्या वतीने तयार करण्यात आला होता.
मात्र हे महाविद्यालय आर्थिक हितसंबंध व राजकीय फायद्यासाठी राजकीय दबाव टाकून हिंगणघाट येथे गैरपद्धतीने पळविल्या गेले. शासनाचा हा निर्णय अत्यंत चुकीचा व लक्षावधी लोकांवर अन्याय करणारा आहे. या संदर्भात संभाजी ब्रिगेडने १३ डिसेंबर २०२३ रोजी जिल्हाधिकारी वर्धा यांना निवेदन दिले. त्यानंतर दि. २० डिसेंबर २०२३ रोजी नागपूरच्या हिवाळी अधिवेशनावर संभाजी ब्रिगेड वर्धा जिल्ह्याच्या वतीने हजारो लोकांचा भव्य मोर्चा काढण्यात आला होता. मात्र, त्याला शासनाने कुठलाही प्रतिसाद न देऊन वर्धा जिल्ह्यातील लक्षावधी लोकांवर घोर अन्याय केलेला आहे.
शासकीय वैद्यकीय महाविद्यालय वर्धा मुख्यालयीच का व्हावे याची पुन्हा एकदा खालील कारणे आपणास देत आहोत.
१) वर्धा शहर हे आठही तालुक्यातील नागरिकांना प्रवासाच्या दृष्टीने सोयीचे ठिकाण आहे. वर्धा शहरपासून जवळपास तालुके ही १५ ते ७० किमीच्या म्हणजेच प्रवासाच्या दृष्टीने जास्तीत जास्त १ तासाच्या अंतरावर आहेत. तसेच सर्व तालुक्यांच्या ठिकाणापासून वर्धा शहराला जोडणारे रस्ते दर्जेदार आहेत. हिंगणघाट येथून समुद्रपूर वगळता इतर सर्व तालुके हे ४२ ते १२४ कि. मी. अंतरावर म्हणजेच प्रवासाला गैरसोयीचे आहेत.
२) तालुक्यांच्या लोकसंख्येचा विचार झाल्यास हिंगणघाट व समुद्रपूर तालुक्यांची अंदाजीत लोकसंख्या ४ लक्ष ते ४.५ लक्ष आहे, त्यामुळे हिंगणघाट येथे हे महाविद्यालय स्थापित केल्यास ते जिल्ह्याचा इतर १४ ते १५ लक्ष एवढ्या मोठ्या लोकसंख्येवर अन्याय करणारे ठरेल.
३) वर्धा शहर लगत सेवाग्राम व सावंगी हे दोन रुग्णालये आहेत ही गोष्ट खरी असली तरी सेवाग्राम रुग्णालयात अनेक सुविधांचा तुटवडा आहे, याठिकाणी ICU च्या खाटा अत्यंत कमी आहेत तसेच न्यूरॉलॉजिस्ट सुद्धा नाही त्यामुळे येथे अपूर्ण उपचार होतात तसेच याठिकाणी गरीब व सर्वसामान्य रुग्णांना पैसेही मोजावे लागतात.सावंगी रुग्णालयाचे उपचार हे अत्यंत महागडे असल्याने ते सर्वसामान्य रुग्णांच्या आवाक्याबाहेरचे आहेत. त्यामुळे अनेक रुग्ण नाईलाजाने नागपूरच्या शासकीय रुग्णालयात उपचार घ्यायला जातात.
४) महाराष्ट्र शासन सार्वजनिक आरोग्य विभाग शासन निर्णय क्रमांक: स्थापना-२०२२/प्र. ३११/ आरोग्य-३आरोग्य सेवा आयुक्तालय, मुंबई यांचे पत्र क्र.-आआसे/कक्ष-३/ टे-७/उपजिरू हिंगणघाट वर्धा श्रेणी ४०० (९४७)/न.क्र.ना.म ४१/ जा.क्र.२००७-०८/२२, दि-०५.१२.२०२२ नुसार हिंगणघाट येथे १०० खाटांच्या उपजिल्हा रुग्णालय हिंगणघाटचे वाढीव ३०० खाटा अतिरिक्त करून एकूण ४०० खाटांच्या जिल्हा रुग्णालयात श्रेणीवर्धन करण्यास मान्यता देण्यात आली आहे. मात्र तरीही हिंगणघाट वरून १२ किलोमीटर अंतरावर मौजे जाम ता. समुद्रपूर या जिल्ह्याच्या टोकावरच्या गावात ही संस्था पळविणे अत्यंत चुकीचे व अन्यायकारी आहे.
त्याचबरोबर हिंगणघाट व समुद्रपूर येथे महाविद्यालयाच्या जागेवरून वाद पेटलेला आहे, दोन्ही परस्परविरोधी गट वेगवेगळ्या ठिकाणी रुग्णालयाची मागणी करत असताना एकमेकांच्या विरोधात उभे ठाकले आहेत. त्यामुळे तिथे महाविद्यालयाची गरज कमी व निवडणुका डोळ्यासमोर ठेऊन राजकारण जास्त सुरू आहे. दळणवळणाची साधने, प्रवासाचे अंतर व लोकसंख्येचे प्रमाण बघता हे महाविद्यालय वर्धा मुख्यालयी होणेच गरजेचे आहे.
या मागणीसाठी इंजि. तुषार उमाळे यांच्या नेतृत्वाखाली संभाजी ब्रिगेडचे धरणे आंदोलन गांधी पुतळा वर्धा येथे पार पडले. येणाऱ्या काळामध्ये वर्धा जिल्हा पिंजून काढून गावांमध्ये जाऊन लोकांमध्ये जागृती निर्माण करून या मागणीसाठी लोकलढा उभारण्याचा मानस तुषार उमाळे यांनी आपल्या मनोगतातून व्यक्त केला. या आंदोलनामध्ये संभाजी ब्रिगेडचे जिल्हाध्यक्ष अतुल शिंदे, काँग्रेसचे जिल्हाध्यक्ष मनोज चांदुरकर, अखिल भारतीय आदिवासी विकास परिषदेचे चंद्रशेखर मडावी, राष्ट्रवादी काँग्रेसचे प्रविण काटकर, आधार संघटनेचे जिल्हाध्यक्ष विक्रम खडसे, ऍड. गुरुराज राऊत, नंदकुमार वानखडे, राहुल गजभिये, विकी सवाई, झकास थुल आदी मान्यवरांनी मनोगत व्यक्त केले. तसेच या आंदोलनाला रविंद्र नाईक, विशाल इंगोले, वैभव कदम, झकास थुल, प्रविण मेश्राम, अमोल कांबळे, योगेश जाधव, बिपिन नगराळे, दीपक चंदनखेडे, योगेश ठाकरे, चारुदत्त कावळे, वैभव भलमे, अक्षय कोल्हे, अलोक चौधरी, अविनाश पवार, निखिल नगराळे, अश्विन परमार, रूपा भालकर, छाया घोडे, रंजना भुरसे, मेघना बुरांडे, भाग्यश्री देवडे, ममता नागोसे, गायत्री कुसराम, सुनंदा बलवीर, लता धाबर्डे, नीता टिपले, मीनाक्षी बहादूरे, ज्योत्स्ना मस्के, सुलोचना वासेकर, वैशाली येसनकर, सुभाष चामाटे, गजू वैद्य, लक्ष्मण झाडे, रूपाली मेंडुले, प्रीती करलुके, बेबी वाळके, अर्चना कांबळे यासह संभाजी ब्रिगेडचे शेकडो कार्यकर्ते उपस्थित होते.