नातेपुते/ प्रतिनिधी :- अत्यंत हलाखीची परिस्थिती असून सुद्धा माझ्या मुलाला मी पोलिस बनवणारच ह्या स्वप्नाला उराशी बाळगून मूळचे सदाशिवनगर येथील पिंटू ओव्हाळ सध्या राहणार पिंपरी चिंचवड आणि पिंपरी चिंचवड येथील भाजी मंडईमध्ये हमाली करणाऱ्या एका बापाचे स्वप्न पूर्ण करण्यात त्यांचा अनिकेत नावाचा मुलगा अवघ्या 20 व्या वर्षी सोलापूर एसआरपीएफमध्ये पोलिस पदावर विराजमान झाला. अनिकेत ओव्हाळ हे सध्या पदवीच्या दुसऱ्या वर्षामध्ये शिकत आहेत. बारावी पूर्ण झाल्यानंतर त्यांनी खूप कष्टाने आणि जिद्दीने अभ्यास करून पोलिस व्हायचे आणि वडिलांचे स्वप्न आहे की, मुलाला वर्दी ही मिळालीच पाहिजे. हे स्वप्न उराशी बाळगून रात्रंदिवस अभ्यास करून अवघ्या दोनच वर्षात सोलापूर येथे झालेल्या एसआरपीएफ या पदाला गवसणी घातली आहे.
त्यांचे अभिनंदन करताना शिवसेना नेते तथा नातेपुते एज्युकेशन सोसायटी विश्वस्त राजकुमार हिवरकर पाटील म्हणाले की, खूप कमी वयात मोठी जबाबदारी तुमच्यासारख्या वीर जवानांच्या हाती आली म्हणजे आपला भारत देश पूर्ण तरुणांच्या हाती आला. वडिलांनी जी हलाखीची परिस्थिती बघितली ती माझ्या मुलाच्या नशिबात येऊ नये म्हणून त्यांनी अनिकेतला चांगले शिक्षण त्याचबरोबर संस्कार ही चांगले दिले. मूळचे सदाशिवनगर येथील रहिवासी असलेले ओव्हाळ कुटुंबीय, पिंपरी चिंचवड येथे वास्तव्यास गेले. तिथे जाऊन त्यांनी मोलमजुरी करीत पिंपरी चिंचवड भाजी मंडई येथे हमाली करीत आहेत. हमाली करीत असताना त्यांना पोलिस आणि वर्दी याचे आकर्षण वाटू लागले व माझ्या मुलाला मी पोलिसच बनविणार असे स्वप्न त्यांनी बाळगले. त्यातच बारावी झाल्यानंतर अनिकेतने चांगला अभ्यास करून पोलिसपदी विराजमान झाला असे गौरवोद्गार काढले. त्यांना भविष्यासाठी शुभेच्छा दिल्या.
यावेळी भाजपचे मनोज जाधव, तेजस गोरे, विनोद बोराटे, रोहित ओव्हाळ, सोमनाथ भोसले, आदित्य सावंत, अनिकेत मिसाळ आदी उपस्थित होते.