* नवनिर्वाचित खासदार श्रीरंग अप्पा बारणे यांची कर्जत विधानसभा मतदार संघ सत्कार समारंभात प्रतिक्रिया
कर्जत / प्रतिनिधी :- कामाच्या...कर्तृत्वाच्या बळावर आम्ही मोठे झालो आहोत. मतदार संघातील साडे 14 लाख मतदारांनी माझ्यावर विश्वास टाकला म्हणून मीलोकसभेत पोहचला. 25 लाख मतदारांचे मी प्रतिनिधीत्व करीत असून मला विश्वास होता, माझा पराभव होणार नाही कारण माझी नाळ जनतेशी जुळलेली आहे, अशी प्रतिक्रिया नवनिर्वाचित खासदार श्रीरंग अप्पा बारणे यांनी व्यक्त केली.
कर्जत विधानसभेचे आमदार महेंद्र थोरवे यांच्या पुढाकाराने नवनिर्वाचित खासदार श्रीरंग अप्पा बारणे यांचा सत्कार सोहळा कर्जत येथे आयोजित करण्यात आला होता. या सोहळ्यात खा. बारणे यांनी मागील 10 वर्षाचा आढावा मांडतांना आगामी काळात मावळ लोकसभा मतदार संघाच्या विकासाबाबत रूपरेखा मांडली. दरम्यान, दुसरीकडे आ. महेंद्र थोरवे यांनी निवडणूक काळात घडलेल्या घडामोडी आक्रमकपणे मांडल्या.
खा. श्रीरंग आप्पा बारणे यांच्या सत्कार सभारंभात आ. महेंद्र थोरवे यांनी आपल्या आक्रमक भाषणातून कार्यकर्त्यांना प्रामाणिकतेची मागणी केली आणि युती धर्म पाळण्याचा आग्रह धरला. आ. थोरवे यांनी खा. बारणे यांच्या कार्याची प्रशंसा करतांना महायुतीच्या काही कार्यकर्त्यांवर आणि घटक पक्षांवर तोफ डागली. आ. महेंद्र थोरवे यांनी खा. बारणे यांच्या विकास कामांची स्तुती करताना सांगितले की, आप्पा यांनी या मतदार संघात खूप काम केले आहे. विकास कार्यात चांगला निधी आणून त्यांनी मतदारांचे प्रश्न सोडवण्याचा प्रयत्न केला आहे. तथापि, थोरवे यांनी महायुतीच्या काही कार्यकर्त्यांच्या वर्तणुकीवर नाराजी व्यक्त केली. त्यांनी स्पष्ट केले की काही कार्यकर्त्यांनी युती धर्म पाळला नाही आणि प्रामाणिकपणे काम केले नाही.
आ. थोरवे म्हणाले की, महायुतीच्या काही घटक पक्षांनी नीट काम केले नाही आणि विरोधी पक्षांनी संविधानाच्या खोट्या प्रचाराचा आधार घेतला आहे. याचबरोबर, त्यांनी सांगितले की, जर महायुतीच्या धोरणांशी आणि युतीशी असहमत होते तर तसे स्पष्ट करण्याची गरज होती. रायगडचा विजय आमच्या शिलेदारांमुळे झाला हे विसरू नका. पक्षाच्या धोरणांवर टीका करण्याऐवजी त्याला समोरासमोर विरोध करा. पाठीवर वार करू नका, असे आव्हान देखील आ. थोरवे यांनी दिले.
थोरवे यांच्या या आक्रमक भाषणाने सभेतील वातावरण अधिक तापले. त्यांनी सांगितले की, प्रामाणिकपणे काम करणारे कार्यकर्ते हेच पक्षाच्या यशाचे खरे शिल्पकार आहेत. जर आपण प्रामाणिकपणे काम केले नाही तर आपले ध्येय साध्य होणार नाही. महेंद्र थोरवे यांच्या या आक्रमक भाषणाने महायुतीच्या कार्यकर्त्यांना एक महत्त्वाचा संदेश दिला आहे. त्यांनी प्रामाणिकतेची मागणी केली आणि पक्षाच्या धोरणांवर विश्वास ठेवून काम करण्याचे आवाहन केले. यामुळे महायुतीच्या आगामी कार्यात कोणते बदल घडणार हे पाहणे महत्त्वाचे ठरेल.
यावेळी खा. श्रीरंग बारणे यांनी खालापूर व कर्जतच्या मतदारांचे तिसऱ्यांदा लोकसभेत पाठविल्याबद्दल मनःपूर्वक आभार मानले. कार्यकर्त्यांचेही आभार मानत, त्यांनी त्यांच्या अथक परिश्रमामुळे हाच विजय साध्य केला असल्याचे नमूद केले. खा. बारणे म्हणाले की, लवकरच खालापूर व कर्जत परिसरात विकासकामे सुरू होतील. पंतप्रधान नरेंद्र मोदी यांच्या नेतृत्वाखाली, मुख्यमंत्री एकनाथ शिंदे, उपमुख्यमंत्री अजित पवार आणि उपमुख्यमंत्री देवेंद्र फडणवीस यांच्या सहकार्याने येत्या काळात मोठ्या प्रमाणात विकास होताना दिसेल.
खा. बारणे यांनी त्यांच्या राजकारणातील सुरूवातीचा प्रवास 1993 पासून कार्यकर्ता म्हणून सुरू केला. ते आज 30 वर्षांपासून राजकारणात कार्यरत आहेत, ज्यामुळे त्यांना विविध प्रकारचे अनुभव आले आहेत. त्यांनी स्पष्ट केले की, तू चाल पुढे गड्या, तुला भीती कशाची, हा त्यांचा मूळमंत्र आहे. खासदार बारणे यांनी गर्वाने सांगितले की, रायगड जिल्ह्यात सर्वाधिक निधी आणण्याचे श्रेय त्यांना जाते. खा. श्रीरंग बारणे यांनी या विजयाची श्रेय मतदार आणि कार्यकर्त्यांना दिले असून, आगामी काळात विकासकामांची आशा व्यक्त केली आहे.