रायगड / नरेश जाधव :- बँक ऑफ इंडिया संचलित स्टार स्वरोजगार प्रशिक्षण संस्था रायगड यांचा वार्षिक क्रियाकलाप अहवाल 2023-24 उद्घाटन सोहळा शुक्रवार दि. 28 जून रोजी अलिबाग येथे रायगड जिल्हाधिकारी किशन जावळे यांच्या हस्ते संपन्न झाला.
रायगड जिल्ह्यामध्ये बँक ऑफ इंडिया संचलित स्टार रोजगार प्रशिक्षण संस्था ही सुशिक्षित युवक-युवती तसेच महिलांना व्यवसायभिमुख प्रशिक्षण देण्याचे काम करीत आहे. यामध्ये प्रशिक्षण घेऊन स्वरोजगार उपलब्ध करण्याचे मार्गदर्शन केले जाते.
यात कुकुटपालन, शेळीपालन, कृत्रिम दागिने बनविणे, अगरबत्ती बनविणे, ज्यूटपासून विविध वस्तू बनविणे,
पेपर बॅग्स आणि कापडी बॅग्स बनविणे, पापड आणि लोणची बनविणे, टेलरिंग, ब्युटी पार्लर, मस्त्यपालन, घरगुती उपकरण दुरुस्ती, फोटोग्राफी, फास्ट फूड अशा विविध प्रकारचे व्यवसाय प्रशिक्षण दिले जाते. स्टार रोजगार प्रशिक्षण संस्थेचा 2023-24 चा वार्षिक अहवाल सोहळा 28 जून रोजी अलिबाग येथे पार पडला. यावेळी संस्थेचे संचालक सुमितकुमार धानोरकर यांनी संस्थेमार्फत मिळणाऱ्या व्यवसायभिमुख प्रशिक्षणाबद्दल माहिती दिली. महिलांनी फक्त गृहिणी न राहता स्वरोजगाराकडे वळावे, त्यासाठी बँक ऑफ इंडिया आणि आरसेटी पूर्णपणे सज्ज आहे. व्यवसायाभिमुख प्रशिक्षणाचा लाभ घेऊन महिलांनी आत्मनिर्भर व्हावे तसेच लहान लहान कामातून मोठी सुरुवात करता येईल आणि त्यातून महिला उद्योजिका निर्माण होतील हे या संस्थेचे प्रमुख उद्दिष्ट आहे. महिलांनी उत्तम प्रशिक्षण घेऊन स्वतःच्या पायावर उभे राहणे व महिलांचे आर्थिक सक्षमीकरण का गरजेचे आहे हे सांगितले. प्रशिक्षणादरम्यान सहभागी प्रशिक्षणार्थींना कौशल्यविषयी संपूर्ण ज्ञान यासोबत उद्योजकीय सक्षमता, संवाद कौशल्य, मार्केटिंग, ध्येय निश्चिती व जोखीम विश्लेषण, आत्मविश्वास बांधणी, बँकिंग, कर्ज अशा विविध विषयांबाबत माहिती व प्रशिक्षण देण्यात येते. सोबतच प्रशिक्षणादरम्यान लागणारे साहित्य, चहा, नाश्ता तसेच जेवणाची व राहण्याची मोफत सोय करण्यात येते. असेही संस्थेचे संचालक यांनी सांगितले.
याप्रसंगी बँक ऑफ इंडिया रायगड विभागाचे प्रमुख मुकेश कुमार, जिल्हा अग्रणी बँकेचे व्यवस्थापक विजय कुमार कुलकर्णी, नाबार्डचे जिल्हा विभाग व्यवस्थापक प्रदीप अपसुंडे, रायगड जिल्हा औद्योगिक केंद्राचे जनरल मॅनेजर जी. एस. हरलया, संस्थेचे संचालक सुमीकुमार धानोरकर तसेच संस्थेचे कर्मचारी व रायगड जिल्ह्यातील विविध बँकांचे अधिकारी तसेच कर्मचारी उपस्थित होते.