* आठवड्याभरात काम न झाल्यास धरणे आंदोलन
* क्रांतीनगरातील नागरीकांचा नगर पंचायतीला इशारा
खालापूर / रविंद्र जाधव :- क्रांतीनगरमधील पांडूरंग जाधव यांच्या घरामागील गटार गेल्या अनेक महिन्यापासून दुरूस्तीच्या प्रतिक्षेत आहे. गेल्या दोन वर्षांपासून क्रांतीनगरमधील पांडूरंग जाधव यांच्या घरामागील गटारावर फुटपाथ व्हावा, अशी मागणी करण्यात येत आहे. नागरीकांसह पत्रकार देखील यांचा वारंवार खालापूर नगरपंचायतीकडे पाठपुरावा करीत आहोत.
स्थानिक नगरसेवक, अभियंता यांनी देखील पाहणी केली होती, पंरतु काम अद्याप झालेले नाही. याबाबत स्थानिक नगरसेवक यांनी सांगितले की, आचारसंहिता लागली आहे काम करता येणार नाही. लोकसभेची निवडणूक तसेच विधानसभेची निवडणूक पार पडली की आपण गटाराचे काम करु. दरम्यान, लोकसभा व विधानसभा निवडणूक संपली परंतु अजूनही त्या गटाराच्या दुरूस्तीला मुहूर्त मिळालेला नाही.
खालापूर शहर व परिसरात कोट्यवधी रुपयांच्या कामांचे भूमिपूजन देखील होत आहेत. मग क्रांतीनगर परिसरातील काम होण्याला विलंब का लागतो ? असा प्रश्न रहिवाशांनी उपस्थित केला आहे. या गटाराच्या फुटपाथवरील स्लॅब (कोबा) पूर्णपणे फुटला असून लोखंडी सळ्या बाहेर आल्या आहेत. तेथून जात असताना अचानक पाय दुसऱ्या बाजूला पडला तर पाय चिरण्याची शक्यता आहे. तसेच रात्री-अपरात्री मोठा अपघात होण्याची शक्यता नाकारता येत नाही. लोकसभा व विधानसभा निवडणुका झाल्या आहेत. तरी या वार्डातील नगरसेवकाला जाग येत नाही का?असा प्रश्न नागरीकांनी उपस्थित केला आहे.
मतांचा जोगवा मागण्यासाठी मतदार संघात लोकप्रतिनिधी घरोघरी फिरतात. खोटी आश्वासने देऊन लोकांना आपलेसे करतात आणि आपली पोळी भाजून होतात व निवडणूक जिंकून आले की, जनतेला वाऱ्यावर सोडतात. नागरीकांच्या समस्या न सोडविणारे लोकप्रतिनिधी काय कामाचे हा प्रश्न सर्वसामान्य माणसाला पडला आहे. आगामी आठवड्याभरात जर या गटाराच्या कामाला गती मिळाली तर तेथील जनता नगरपंचायतीसमोर धरणे धरणार असल्याचे नागरिकांनी सांगितले.