* जिल्हाधिकारी अशोक शिनगारे : टीबी मुक्त 28 ग्राम पंचायती कांस्य तर 136 रौप्य मानांकनाने सन्मानित
ठाणे / अमित जाधव :- इ. स. 1882 साली डॉं. रॉबर्ट कॉक यांनी क्षयरोगाच्या जिवाणूंचा शोध लावला. त्यांचा प्रबंध जागतिक शास्त्रज्ञाच्या परिषदेत मांडला व त्यास 24 मार्च रोजी मान्यता मिळाली, यासाठी 24 मार्च हा दिवस जागतिक क्षयरोग म्हणून साजरा करीत क्षयरोग दुरीकरणाकरीता विविध जनजागृती उपक्रम राबविण्यात येतात. त्याअनुषंगाने जिल्हा क्षयरोग केंद्र, ठाणे कार्यालय अंतर्गत 24 मार्च, 2025 रोजी जिल्हाधिकारी ठाणे यांच्या अध्यक्षतेखाली टीबी मुक्त ग्रामपंचायत अभियानांतर्गत टीबी मुक्त ग्रामपंचायती म्हणुन निवड करण्यात आलेल्या केंद्र शासनाच्या निर्देशांकानुसार व सहसंचालक आरोग्य सेवा, क्षय व कुष्ठ पुणे यांच्या मार्गदर्शक तत्वानुसार एकूण 28 कांस्य व 136 रौप्य प्रशस्तीपत्र देऊन जिल्हाधिकारी अशोक शिनगारे यांच्या हस्ते गौरविण्यात आले आहे. तसेच 12 निक्षय मित्र व 4 टीबी चॅम्पीयन यांना देखील प्रशस्तीपत्र देऊन सन्मानित करण्यात आले आहे.
याप्रसंगी जिल्हाधिकारी अशोक शिनगारे यांनी ठाणे जिल्हातील एकूण ग्रामपंचायतीमधील 28 कांस्य व 136 रौप्य मानांकन देऊन पुढील वर्षी उर्वरित सर्व ग्रामपंचायती ह्या लवकरच सिल्वरमधून सुवर्ण नामांकन प्राप्त करण्यास प्रयत्न करून ठाणे जिल्ह्यात क्षयरोग हद्दपार करू यात, असे आवाहन केले.
कार्यक्रम हा जिल्हा क्षयरोग केंद्र कार्यालय व जीएलआरए इंडिया (जर्मन लेप्रसी एन्ड टीबी रिलीफ असोसिएशन ऑफ इंडिया) या संस्थेच्या संयुक्त विद्यमाने आरोग्य शिबीर आयोजित करण्यात आले आहे. त्यामध्ये एनकेटी माध्यमिक ज्युनिअर महाविद्यालयातील 250 मुलांची आरोग्य तपासणी करण्यात आली. तसेच नर्सिंग टीएनकेटी महाविद्यालयातील विद्यार्थ्यांची टीबी विषयक चित्रकला, रांगोळीच्या स्पर्धा आयोजित करण्यात आल्या होत्या. तसेच टीबी जनजागृती करिता पथनाट्य नर्सिंग महाविद्यालयातील विद्यार्थ्यांनी जिल्हा आरोग्य अधिकारी डॉं. गंगाधर परगे यांच्या समोर सादर केला.