* रायगड जिल्हाधिकारी यांच्याकडे लेखी मागणी
* आप शहर अध्यक्ष ग्यासुद्दीन खान यांचे निवेदन
* रसायनांमुळे कॅन्सर, अल्सर, त्वचारोगांना निमंत्रण ?
खोपोली / खलील सुर्वे :- खालापूर तालुक्यासह खोपोली शहरात एकापेक्षा एक ब्रँड असलेल्या नावाची चहाची दुकाने गल्लीबोळापासून ते बाजारपेठ, रस्त्यांवर, छोट्या-मोठ्या स्टॉल स्वरूपात सुरु करण्यात आली असल्याचे दिसून येत आहे. धावपळीच्या दिनचर्चेत फक्कड चहाचा एक घोटसुद्धा ताजेतवाने करतो. चहाचा घोट घेतल्यानंतर थोड्या वेळासाठी तरतरी वाटते पण हा गरम चहा प्लास्टिकच्या किंवा प्लास्टिक कोटिंग केलेल्या पेपर (कागदी) कपात सतत घेणे आरोग्याच्या दृष्टीने घातक आहे. गरम पदार्थांमुळे प्लास्टिकमधील घातक रसायने त्यात विरघळतात आणि पोटात जातात. त्यातून शरीरात जाणाऱ्या घातक रसायनांमुळे कॅन्सर, अल्सर आणि त्वचारोगांना आमंत्रण मिळते. मात्र, खालापूर तालुक्यासह खोपोलीमध्ये 'चाय पे चर्चा' करण्यासाठी आलेल्या नागरिकांना चहा स्टॉल चालक आपला ब्रँड असलेल्या नावाखाली बनविण्यात आलेला गरमा-गरम चहा काचेच्या अथवा मातीच्या कपात न देता 'युज अँड थ्रो' प्लास्टिक कोटेड कपात देण्यात येत असल्याचे दिसून येत आहे. तसेच लोक चहाचा आनंद घेत पिताना दिसतात. मात्र, जेवढे गरम तेवढेच घातक खाद्य पदार्थांसाठी प्लास्टिकच्या भांड्यांचा वाढता वापर घातक आहे. सतत प्लास्टिकच्या कपातून चहा पिणे, प्लास्टिक बॉटल आणि प्लेट्सचा वापर करणे हे आरोग्याच्या दृष्टीने घातकच आहे. जेवढा गरम पदार्थ यात दिला तेवढी घातक रसायने झटपट मिसळतात आणि काही मानसिक आजारास कारणीभूत ठरतात. त्यामुळे प्लास्टिकचे कप, बाटल्या, ताटांचा वापर शक्य तेवढा कमी ठेवणेच आरोग्याच्या हिताचे आहे, असे वारंवार डॉंक्टरांकडून सांगितले जाते, असे आम आदमी पार्टी खोपोली शहराध्यक्ष ग्यासुद्दीन खान यांच्याकडून सांगण्यात आले.
चहाच्या टपरीवरील कागदी आणि प्लास्टिक कपांवर बंदी घालण्याचे आदेश रायगड जिल्हाधिकारी यांनी द्यावेत, अशी मागणी 'आप'चे शहर अध्यक्ष ग्यासुद्दीन खान यांच्याकडून करण्यात येत आहे. कागदी तसेच प्लास्टिक कपावर बंदी घालावी, हे कप बनवितांना विषारी केमिकल्स त्यामधे वापरले जातात, त्यामुळे कॅन्सर, अल्सर आणि त्वचारोगांचा धोका उद्भवू शकतो. यासाठी या कपवर बंदी आणावी, अशी मागणी खान यांनी केली आहे.
सध्या थंडीचे दिवस सुरू आहेत आणि थंडी म्हटले की चहा तर लागणारच. चौकात...कट्ट्यावर दोस्त मित्रांच्या बरोबर थंडीमध्ये चहा घ्यायची एक मजाच वेगळीच. मात्र, हा चहा थेट कॅन्सर, अल्सर आणि त्वचारोगांना निमंत्रण देऊ शकतो हे तुम्हाला माहिती आहे का ? होय थेट कॅन्सरलाच निमंत्रण. मात्र तुम्ही घेत असलेल्या चहामुळे नव्हे तर तुम्ही ज्यामध्ये चहा घेतात त्या प्लास्टिकच्या कपामुळे...पूर्वी या कपाऐवजी काचेचा ग्लास किंवा चिनी मातीने बनविलेला कप खूप वापरला जायचा. मात्र, आता त्या कपाची जागा प्लास्टिकच्या कपांनी घेतल्यामुळे कॅन्सरचा धोका वाढला आहे, अशी तक्रार घेऊन खोपोलीतील आपचे शहर अध्यक्ष यांनी थेट या कपांवर बंदी घालावी, अशी मागणी केली आहे. कारण हे कप बनविताना त्यामध्ये बीपीए नावाचे केमिकल वापरले जाते आणि हे केमिकल आरोग्याला हानिकारक आहे. या प्लास्टिकच्या कपाने सर्व चहा टपऱ्यांवर मोठे अतिक्रमण केले आहे. एवढेच काय चहा पिल्यानंतर तो कप फेकून देण्यात येतो आणि त्याचे विघटन होत नसल्यामुळे पर्यावरणालाही त्याचा धोका उद्भवू शकतो, अशी माहिती खान यांनी देत त्यावर बंदी घालण्याची मागणी केली आहे.