* पोलिस निरीक्षक सुरेंद्र गरड यांनी केला कायापालट
* नागरीकांसाठी शुध्द पिण्याचे पाणी, बैठक व्यवस्था
* सर्वत्र सिसीटीव्ही कॅंमेरे, शौचालय, पार्कींग व्यवस्था
* केबीनला नेमप्लेट, सुचना पेटी, कचराकुंडी, जनरेटर
कर्जत / नरेश जाधव :- पोलिस स्टेशनमध्ये येणारी व्यक्ती ही त्रासलेली असते...राग, भय, क्रोध आणि टेन्शनमध्ये असते...वाद, फसवणूक, छळवणूक अशा परिस्थितीत ती व्यक्ती येते...अशा व्यक्तीला मानसिक आधारासह चांगल्या, मनशांती, आनंदी, प्रसन्न, उत्साहित वातावरणाची गरज असते, हिच गरज ओळखून कर्जत पोलिस स्टेशनचे वरिष्ठ पोलिस निरीक्षक सुरेंद्र गरड यांनी कर्जत पोलिस स्टेशनचा कालापालट केला आहे.
पोलिस स्टेशन परिसरात आलेल्या व्यक्तीला एक चांगले वातावरण मिळाले पाहिजे...पोलिस स्टेशनमध्ये काम करणारे कर्मचारी उत्साहित राहिले पाहिजेत. तसेच पोलिस स्टेशनला आयएसओ (ISO) नामांकन प्राप्त झाले पाहिजे, यासाठी रायगड जिल्हा पोलिस अधिक्षक सोमनाथ घार्गे यांच्या संकल्पनेतून जिल्ह्यातील पोलिस स्टेशन अपडेट करण्यात येत आहेत. अप्पर पोलिस अधिक्षक अभिजित शिवथरे व कर्जत उपविभागीय पोलिस अधिकारी धुळा टेले यांच्या मार्गदर्शनाखाली पोलिस निरीक्षक सुरेंद्र गरड यांनी कर्जत पोलिस स्टेशनचे नुतनीकरण केले आहे.
पोलिस स्टेशन परिसरात आलेल्या वाहनांसाठी शेड उभारत पार्किंगची व्यवस्था केली आहे. पोलिस स्टेशन इमारतीतून बाहेर येतांना मैदान आहे, त्यात छोटा-मोठा अपघात होवू नये यासाठी रेलिंग लावण्यात आली आहे. आलेल्या नागरिकांना बसण्यासाठी बैठक व्यवस्था, त्यांना वाचनासाठी वृत्तपत्र, पिण्याचे शुध्द पाणी, कचराकुंडी, आलेल्या नागरिकांसाठी शौचालय, आतील प्रत्येक केबीनबाहेर अधिकारी व कर्मचारी यांची नेमप्लेट, सुचना पेटी आणि सीसीटीव्ही लावण्यात आले आहेत.
तक्रार नोंदविण्यासाठी आलेल्या नागरिकांना एकांत वातावरण मिळावे यासाठी ठाणे अंमलदार यांचे चांगले, सुसज्ज केबीन देण्यात आले आहे. प्रत्येक केबीनबाहेर नेमप्लेट लावण्यात आले आहेत. या 5 बीट सामावून घेणाऱ्या कर्जत पोलिस स्टेशनमध्ये 43 कर्मचारी ज्यात 12 महिला पोलिस कर्मचारी, 1 एपीआय, 5 पीएसआय यांचा समावेश आहे. येणाऱ्या काळात कर्जत पोलिस स्टेशन परिसरात वृक्ष लागवड करीत सर्वत्र हिरवळ करण्याचा मानस पोलिस निरीक्षक सुरेंद्र गरड यांनी व्यक्त केला.
कर्जत पोलिस स्टेशन प्रशासकीय इमारतीचा भूमिपूजन सोहळा 23 सप्टेंबर 2007 रोजी सकाळी 11 वाजता तत्कालीन अन्न नागरी पुरवठा व ग्राहक संरक्षण तथा रायगड जिल्हा पालकमंत्री सुनील तटकरे यांच्या हस्ते व सार्वजनिक बांधकाम, वने, पर्यावरण व आदिवासी विकास मंत्री रविशेठ पाटील यांच्या अध्यक्षतेखाली कोकण परिक्षेत्र पोलिस महानिरीक्षक कौशल कुमार पाठक, कर्जत-खालापूर विधानसभा मतदार संघाचे आमदार देवेंद्र साटम, पोलिस अधिक्षक प्रताप दिघावकर, अप्पर पोलिस अधिक्षक मधुकर तळपाडे यांच्या उपस्थितीत झाले होते. तर उद्घाटन सोहळा 1 सप्टेंबर 2008 रोजी दुपारी 4 वाजता तत्कालीन अन्न नागरी पुरवठा व ग्राहक संरक्षण तथा रायगड जिल्हा पालकमंत्री सुनील तटकरे यांच्या हस्ते व सार्वजनिक बांधकाम, वने, पर्यावरण व आदिवासी विकास मंत्री रविंद्र पाटील, कोकण परिक्षेत्र पोलिस महानिरीक्षक कौशल कुमार पाठक, कर्जत-खालापूर विधानसभा मतदार संघाचे आमदार देवेंद्र साटम, पोलिस अधिक्षक प्रताप दिघावकर, कर्जत उपविभागीय पोलिस अधिकारी पी. डी. तिवारी यांच्या प्रमुख उपस्थितीत झाले होते. दरम्यान, 1 जुलै 2023 रोजी पोलिस निरीक्षक सुरेंद्र गरड यांनी पदभार स्विकारला आणि तेव्हापासून कर्जत पोलिस स्टेशनचा कालापालट केला आहे. सर्ववेळ...सर्वांसाठी...असे ब्रिद वापरत त्यांनी नागरीकांसाठी पोलिस स्टेशनचे वातावरण आनंदी व प्रसन्न, उत्साहित, प्रफुल्लित केले आहे.