* महिलांसाठी विशेष 'वॉकथॉन' स्पर्धा, विजेत्या महिलांना मिळणार 'नथ' आणि पैठणी
वसई / प्रतिनिधी :- यंग स्टार ट्रस्ट, अमेय क्लासिक क्लब, विराट फाऊंडेशन आयोजित रविवार, 9 फेब्रुवारी रोजी "विरार रन 2025" पार पडणार आहे. यात 18 वर्षांवरील सर्व वयोगटातील 10 किमी दौड आयोजित करण्यात आली आहे. तसेच 6 ते 16 वयोगटातील मुले व मुलींसाठी 1.5 किमी दौड आयोजित करण्यात आली आहे. 1.5 किमी दौडमध्ये भाग घेणाऱ्या सर्वांसाठी प्रवेश मोफत आहे. तसेच यावेळी फन रन दरवर्षीप्रमाणे आयोजित करण्यात येते. तर विरार रनमध्ये महिलांसाठी विशेष 'वॉकथॉन' आयोजित करण्यात आली आहे.
वॉकथॉनमध्ये कमीत कमी 5 जास्तीत जास्त 10 महिलांचा एक संघ बनविणे आवश्यक आहे. प्रत्येक संघाला 5 संदेश देणे आवश्यक असणार आहे. यातील 4 सामाजिक संदेश आम्ही दिलेले आहेत तर 5 संदेश हा संघांना बनवायचा आहे. जसे वसई विरार महानगरपालिका मॅरॅथॉनचे ब्रीदवाक्य 'स्त्री भ्रूण हत्या टाळा, निसर्गाचा समतोल पाळा', विरार रनचे ब्रीद वाक्य 'गो ग्रीन गो क्लीन', विरार पोलिसांचे ब्रीद वाक्य 'से नो टू ड्रग्स', विरार मेडिकल असोसएशनचे ब्रीद वाक्य 'से नो टू डिप्रेशन' हे 4 संदेश असणार आहेत.
5 सामाजिक संदेश हा संघाने स्वतः बनवायचा आहे. तसेच हे संदेश स्वतः तयार करून फलक बनवून आणायचे आहेत. महिला संघाकडून बनविण्यात आलेला सामाजिक संदेश ज्वलंत सामाजिक मुद्द्यावर असणे गरजेचे आहे आणि तो लेखी स्वरूपात अमेय क्लासिक क्लब येथे प्राधिकृत व्यक्तीकडे जमा करण्यात यावा. रन झाल्यावर आपण बनविलेला संदेश समजावणे गरजेचे आहे. फन रनच्या फॉर्ममध्ये आपल्या संघाबाबत संपूर्ण माहिती सादर करणे गरजेचे आहे. सदर माहितीसोबत एक सरकारी ओळखपत्र जोडणे अनिवार्य आहे. याचबरोबर रन संपल्यावर वॉकथॉनमध्ये भाग घेतलेल्या प्रत्येक महिलेने सेल्फी पॉइंटवर फोटो स्वतः काढावा यासाठी विरार रनचे स्वयंसेवक त्यांना सहकार्य करतील. हा फोटो महिलांनी स्वतःच्या इंस्टाग्रामवर अपलोड करून विरार रन इंस्टाग्राम अकाउंटला टॅग करणे व कोलॅब करणे गरजेचे आहे. स्व. भारतीताई देशमुख यांच्या कन्या गौरी देशमुख आणि उत्कर्ष विद्यालयाच्या उपमुख्यध्यापिका चित्रा सुनील ठाकूर यांच्याकडून स्पर्धेचे परीक्षण करण्यात येणार असून यातून 4 संघांना पारितोषिकाच्या स्वरूपात रोख बक्षिसे व मानचिन्ह देण्यात येणार आहे. स्पर्धेत भाग घेतलेल्या महिलांनी साडी नेसून पारंपरिक वेशभूषेत येणे गरजेचे आहे. वॉकथॉनमध्ये सहभाग घेण्यासाठी अमेय क्लासिक क्लब येथे फॉर्म भरून नोंदणी करणे आवश्यक आहे व ही नोंदणी विनामूल्य होणार आहे.
सर्व महिलांना आवाहन करण्यात येते की, आपण जास्तीत जास्त संख्येने ह्या स्पर्धेचा लाभ घ्यावा, असे आवाहन पत्रकार परिषदेत आयोजकांकडून करण्यात आले. यावेळी माजी नगरसेवक हार्दिक राऊत, माजी नगरसेवक अजय संघवी, माजी नगरसेवक हनुमंत कावळे, आयोजक संदीप डूरे पाटील, जतीन पाटील, भूषण चुरी, रवी गायकवाड, अमेय मोरे, स्वप्नील पारकर, चेतन जाधव, ओमकार सांगळे, विकास अंबो पाटील, विनीत परुळेकर, श्रद्धेश देशमुख, राम जटार, अशोक गोरे, अंजली कदम, मिताली साळुंखे, पूजा दळवी, स्मिता सावंत, अनिता कांबळे, समीक्षा गोरीवले, कविता धनगर, रजनी गुरव, प्राची मनोहत्रा, तेजश्री नाईक आदी आयोजक उपस्थित होते.