कर्जत / पंकेश जाधव :- ग्रामीण भारताच्या सक्षमीकरणासाठी MET Institute of Management (MET IOM) आणि माऊली फाऊंडेशनने उन्नत भारत अभियान (UBA) अंतर्गत कर्जत तालुक्यातील भोईरवाडी येथे विशेष उपक्रम राबविला. या उपक्रमाचा उद्देश शाश्वत विकासासाठी संधी निर्माण करणे आणि सामाजिक अंतर दूर करण्यावर होता.
* पाच गावे दत्तक, शाश्वत विकासावर भर :-
MET IOM आणि माऊली फाऊंडेशनने उन्नत भारत अभियानाच्या अंतर्गत पाच गावे दत्तक घेतली आहेत. यामध्ये आरोग्यसेवा, शिक्षण, स्वच्छता आणि उपजीविकेच्या संधी निर्माण करण्यावर भर दिला गेला. बेसलाइन सर्वेक्षणाद्वारे या गावांमधील सुमारे 100 व्यक्तींची सामाजिक-आर्थिक स्थिती (SEC) तपासण्यात आली. यामुळे गावकऱ्यांच्या गरजांची सखोल माहिती मिळाली.
* सामाजिक जागरूकता मोहीम आणि सरकारी योजनांची माहिती :-
गावकऱ्यांना विविध सरकारी योजनांची माहिती देत त्यांना सशक्त करण्यासाठी जागरूकता मोहीम राबविण्यात आली. MET च्या विद्यार्थ्यांनी आणि माऊली फाऊंडेशनच्या स्वयंसेवकांनी गावकऱ्यांसोबत संवाद साधत त्यांना विकास प्रक्रियेत सहभागी करून घेतले.
* आरोग्य तपासणी शिबिराचे आयोजन :-
भोईरवाडी येथे MET Institute of Management ग्रीन क्लबतर्फे आरोग्य तपासणी शिबिराचे आयोजन करण्यात आले. या शिबिरात खालील सेवा मोफत देण्यात आल्या. दंत तपासणी, सामान्य आरोग्य सल्ला, रक्त चाचण्या, डोळ्यांची तपासणी विशेष म्हणजे शिबिरादरम्यान कमी दरात चष्मा उपलब्ध करून देण्यात आला, ज्यामुळे डोळ्यांच्या समस्या सोडविण्यास मदत झाली.
* शिबिरातील मान्यवर आणि योगदानकर्ते :-
या शिबिरात डॉं. निर्मला जोशी, डॉं. संदीप चोपडे, ऍंड. अजित सावंत, उपसरपंच संदेश भोईर, मा. उपसरपंच सुभाष गायकवाड, राहुल दूधसागर, सामाजिक कार्यकर्ते प्रतिक अनिल जाधव, निलेश विलास धुळे, समीर डोळस, भास्कर मुने, सामाजिक कार्यकर्ते केतन जाधव, सामाजिक कार्यकर्ते आशिष जाधव यांच्यासह अनेक आरोग्यसेवा व्यावसायिक व स्थानिक मान्यवर उपस्थित होते. याशिवाय MET IOM चे विद्यार्थी आणि प्राध्यापकांनीही सक्रिय सहभाग घेतला.
सर्वेक्षणातून मिळालेली अंर्तदृष्टी आणि पुढील योजना आरोग्य शिबिरादरम्यान केलेल्या सर्वेक्षणातून गावकऱ्यांच्या गरजांविषयी महत्त्वपूर्ण माहिती मिळाली. या माहितीच्या आधारे प्रभावी धोरणे तयार करून ती सरकारी अधिकाऱ्यांसमोर मांडली जाणार आहेत.
गावकऱ्यांनी विद्यार्थ्यांच्या प्रयत्नांना उत्स्फूर्त प्रतिसाद दिला, ज्यामुळे हा उपक्रम यशस्वी ठरला. MET Institute of Management आणि माऊली फाऊंडेशनच्या सामूहिक प्रयत्नांनी भोईरवाडीच्या विकासाचा मार्ग सुलभ केला आहे.