खालापूर / प्रतिनिधी :- महामार्गांवर होणारे अपघात टाळण्यासाठी समाजातील सर्वच घटकांनी संयुक्त प्रयत्न करायला हवेत. आपल्या मागे परिवार आहे ही भावना सतत मनात असायला हवी. वाहन चालवताना शॉर्टकटचा वापर आणि नियम भंग झाल्यास स्वतः सोबत इतरांचा जीव धोक्यात येऊ शकतो. युवा पिढीनेही महामार्गांवरील सुरक्षा या विषयाकडे गांभीर्याने पाहिले पाहिजे. पुस्तकी शिक्षणापेक्षा महामार्गांवरील अपघात टाळण्यासाठी तारतम्य बुध्दीचा वापर व्हायला हवा किंबहुना रस्ते सुरक्षा अभियान हे जानेवारी महिन्यापुरते मर्यादित न राहता वर्षाचे बारा महिने राबविणे गरजेचे आहे, असे प्रतिपादन महाराष्ट्र राज्य अपर पोलिस महासंचालक (वाहतूक) डॉं. सुरेश कुमार मेकला यांनी केले. मुंबई-पुणे द्रुतगती महामार्गांवर पळस्पे केंद्रात पोलिस अधिक्षक महामार्ग सुरक्षा पथक रायगड परिक्षेत्र यांच्या वतीने रस्ते सुरक्षा अभियान २०२५ च्या अनुषंगाने आयोजित केलेल्या कार्यक्रमात ते बोलत होते.
दि. ३१ जाने २०२५ रोजी रस्ते सुरक्षा अभियान - २०२५ च्या समारोपाच्या कार्यक्रमात महामार्गांवरील अपघात टाळण्यासठी आणि तत्परतेने पोलिस यंत्रणेला अपघात प्रसंगी स्वयंस्पूर्तीने मदत करणाऱ्या अपघातग्रस्तांच्या मदतीसाठी सामजिक संस्था, मृत्युंजय देवदूत, आयआरबी पेट्रोलिंग टीम, डेल्टा फोर्सचे जवान, देवदूत यंत्रणा, लोकमान्य हॉस्पिटलचे कर्मचारी, पोलिस कर्मचारी तसेच पत्रकार आणि सामजिक कार्यकर्ते यांचा सत्कार डॉं. सुरेश कुमार मेकला यांच्या हस्ते करण्यात आला.
अपघातात कशा प्रकारे मदत करता येऊ शकते याबाबत हेल्प फाऊंडेशनचे अध्यक्ष गुरुनाथ साठेलकर यांनी माहिती दिली तर सारथी सुरक्षा सेवा संस्थेचे अध्यक्ष विनय मोरे यांनी उपस्थितांना प्रवास करतांना सिग्नलची उपयुक्तता तसेच सुरक्षित प्रवासासाठी महत्वाच्या टिप्स दिल्या. कार्यक्रमाचे प्रास्तविक रायगड महामार्ग सुरक्षा पथक पोलिस अधिक्षक तानाजी चिखले यांनी तर आभार रायगड उपविभागीय पोलिस अधिकारी ज्योत्स्ना रासम यांनी केले.
रस्ते सुरक्षा अभियाना अंतर्गत निबंध, वकृत्व आणि चित्रकला स्पर्धेत गुणांकन प्राप्त केलेल्या विद्यार्थ्यांना गौरविण्यात आले. महामार्ग वाहतूक पोलिस विभागासाठी आयोजित केलेल्या क्रिकेट स्पर्धांतील विजेत्या बोरघाट आणि पळस्पे केंद्राच्या टीमचाही पुरस्कार देऊन गौरव करण्यात आला. या कार्यक्रमात खालापूर उपविभागीय पोलिस अधिकारी विक्रम कदम, पोलिस निरीक्षक विनोद माळवे, प्रभारी अधिकारी वैभव रोंगे, आरटीओ विभागाचे जय शेठे आदी उपस्थित होते.