* इंडियन रेडक्रॉस सोसायटी, जिल्हा दिव्यांग पुनर्वसन केंद्र, समाजकल्याण विभागाचा संयुक्त उपक्रम
चोपडा / प्रतिनिधी :- जागतिक दिव्यांग दिन सप्ताह निमित्ताने रेडक्रॉस सोसायटी, जिल्हा दिव्यांग पुनर्वसन केंद्र व जिल्हा समाजकल्याण विभाग जि. प. जळगाव यांच्या संयुक्त विद्यमाने विविध क्षेत्रासह दिव्यांगांच्या हितासाठी परोपकारी कार्य करणाऱ्या व्यक्ती व संस्थांचा गौरव करणे अत्यावश्यक असल्याचे हेरुन यंदा निवासी उपजिल्हाधिकारी भिमराव दराडे यांच्याहस्ते डॉं. बाबासाहेब आंबेडकर बहुउद्देशीय संस्था चोपडा व संस्था अध्यक्ष महेश पांडुरंग शिरसाठ यांचा पुरस्कार देऊन गौरव करण्यात आला. यावेळी दिव्यांगांना रोजगार उपलब्ध करून देणाऱ्या कंपन्या, डॉक्टर्स यांनाही सन्मानित करण्यात आले.
पत्रकार महेश शिरसाठ हे डॉं. बाबासाहेब आंबेडकर बहुउद्देशीय संस्थेच्या माध्यमातून गोरगरीब विद्यार्थी, आदिवासी, दिव्यांग व्यक्ती यांच्यासाठी आपल्यापरीने जे शक्य आहे ते कार्य तळमळीने करीत असतात. शिवाय शासकीय योजनांची माहितीही गरजुंपर्यंत पोहचविण्यासाठी मोलाचे परोपकारी काम करीत आहेत, त्यांचे उत्कृष्ट सामाजिक कार्य पाहून त्यांच्या कार्याची दखल घेण्यात आली आहे.
कार्यक्रमाच्या अध्यक्षस्थानी जिल्ह्याचे निवासी उपजिल्हाधिकारी भिमराज दराडे यांनी भूषविले तर प्रमुख पाहुणे म्हणून जिल्हा समाजकल्याण अधिकारी विजय रायसिंग, उपजिल्हा शल्य चिकीत्सक डॉं. आकाश चौधरी, डॉं. उल्हास पाटील, फिजीयोथेरपी महाविद्यालयाचे प्राचार्य डॉं. जयवंत नागुलकर, रेडक्रॉसचे उपाध्यक्ष गनी मेमन, पुष्पाताई भंडारी, नोडल अधिकारी जी. टी. महाजन, दिव्यांग विभागाच्या माधुरी भागवत, स्वयंदीप प्रकल्पाच्या संचालिका मिनाक्षी निकम, मुक्ती फाऊडेशनचे मुकुंद गोसावी, युथ फॉर जॉबचे महेंद्र पाटील आदी उपस्थित होते. तसेच जिल्ह्यातील विविध सामाजिक दिव्यांग संस्था, संघटना यांचे प्रतिनीधी उपस्थित होते.
कार्यक्रमासाठी जिल्हा दिव्यांग पुनर्वसन केंद्राचे एस. पी. गणेशकर, सुवर्णा चव्हाण, रेडक्रॉसचे लक्ष्मण तिवारी, उज्वला वर्मा, मनोज वाणी, योगेश सपकाळे, समाधान वाघ तसेच सामाजिक संस्थेचे अनेक पदाधिकारी यांनी विशेष परीश्रम घेतले.