* रुग्ण हक्क परिषदेचा मुख्यमंत्री देवेंद्र फडणवीस यांच्याकडे पाठपुरावा
पुणे / मानसी कांबळे :- पुणे शहर पोलिस दलातील महिला पोलीस कर्मचारी स्मिता कीरतकर यांच्यावर फुफ्फुस प्रत्यारोपण शस्त्रक्रिया (Lung Transplant Operations) करण्याचे निश्चित झाले होते. रुग्ण हक्क परिषदेने पाठपुरावा करून गेल्या वर्षी देवेंद्र फडणवीस जी उपमुख्यमंत्री असताना ऑपरेशनसाठी सुमारे 50 लाख रुपये मंजूर करून घेतले होते.
गेली वर्षभर अवयव उपलब्ध होत नसल्याकारणाने महिला पोलिस कर्मचारी स्मिता यांच्यावरचे ऑपरेशन होऊ शकत नव्हते. मात्र गेल्याच आठवड्यात स्मिता किरतकर यांच्यावरील 50 लाख रुपये खर्चाची शस्त्रक्रिया पूर्णपणे मोफत झाली. 50 लाखांपैकी किरतकर यांनी स्वतः भरलेली 15 लाख रुपयांच्या रक्कमेचा परतावा देखील त्यांना शासन स्तरावरून परत देण्यात येणार आहे.
स्मिता यांची तब्येत आता स्थिर असली तरी आणखी पंधरा दिवस त्यांच्यावर डी. वाय. पाटील हॉस्पिटल, पिंपरी पुणे येथे उपचार सुरू राहणार आहेत. त्यांच्यावरील उपचारांसाठी पिंपरी येथील डी. वाय. पाटील हॉस्पिटलचे सर्वेसर्वा यशराज पी. पाटील, हॉस्पिटलचे प्रमुख हनुमंत चव्हाण, प्रमोद पाटील यांचे शस्त्रक्रिया करण्याबद्दल आभार मानले.
स्मिता किरतकर यांची 50 लाख रुपयांची शस्त्रक्रिया मोफत व्हावी यासाठी मुख्यमंत्री देवेंद्रजी फडणवीस यांच्याकडे पाठपुरावा करण्यासाठी रुग्ण हक्क परिषदेचे समन्वयक राजेंद्र कदम, मुख्यमंत्री सहाय्यता निधीचे प्रमुख रामेश्वर नाईक, भारतीय जनता पार्टीचे अमोल शुक्ला, तत्कालीन भाजपचे आणि आताचे राष्ट्रवादीचे वडगाव शेरी विधानसभा मतदारसंघाचे आमदार बापूसाहेब पठारे, पोलिस महासंचालक रश्मी शुक्ला, दूरदर्शनचे ज्येष्ठ पत्रकार मिलिंद लिमये, रुग्ण हक्क परिषदेच्या पुणे शहर अध्यक्षा अपर्णा साठ्ये, पुणे शहर पोलिस अतिरिक्त आयुक्त अरविंद चावरिया यांनी अत्यंत तळमळीने लक्ष घालून, पाठपुरावा करून स्मिता किरतकर यांची शस्त्रक्रिया होण्यासाठी प्रचंड प्रयत्न केले.