* अमेरिकेत पैसे कमावण्यासाठी गेलेल्या भारतीयांवर कर्जाचा डोंगर
नवी दिल्ली / प्रतिनिधी :- अमेरिकेतील बेकायदा भारतीय स्थलांतरितांना परत मायदेशी पाठविण्याची प्रक्रिया सुरू झाली आहे. ‘सी-17’ या अमेरिकन लष्कराच्या विमानातून टेक्सासमधील सॅन अँटोनियो येथून 100 हून अधिक बेकायदा स्थलांतरितांना भारतात आणले गेले. पण भारतात पुन्हा आलेल्या या लोकांसमोर आता मोठे संकट उभे राहिले आहे. कारण जे लोक अमेरिकेत पैसे कमावण्यासाठी गेले होते, त्यांनी याकरीता 30 ते 50 लाख रुपयांपर्यंत खर्च केला होता. धक्कादायक म्हणजे कर्ज घेऊनच या लोकांनी अमेरिकेत जाण्याचा निर्णय घेतला होता, पण आता मात्र हे कर्ज फेडायचे कसे ? असा मोठा प्रश्न या भारतीयांसमोर उभा राहिला आहे.
पंजाबमधील हजारो लोक अमेरिकेत जावून स्थायिक होऊ या विचाराने आपली मातृभूमी सोडतात. याकरीता ते लाखों रुपयांचे कर्ज घेतात आणि डंकी या अवैध मार्गांने आपला जीव धोक्यात घालून अमेरिकेत प्रवेश करतात. पण आता जेव्हा अमेरिकेच्या डोनाल्ड ट्रम्प सरकारने बेकायदेशीर स्थलांतरितांना त्यांच्या देशात परत पाठविण्यास सुरुवात केली, तेव्हा तिथे बेकायदेशीरपणे राहणारे भारतातील लोकही त्यात अडकले. ज्यानंतर हे स्थलांतरित आता भारतात परतू लागले असून यातील अनेक भारतीयांनी प्रसार माध्यमांसमोर त्यांच्यावर ओढावलेल्या आर्थिक संकटाची माहिती दिली.
अमेरिकेतून भारतात परतलेल्या एका व्यक्तीने म्हटले की, अमेरिकेत जाण्यासाठी तब्बल 30 ते 35 लाख रुपयांपर्यंत खर्च आला. परंतु, इतका खर्च करून सुद्धा अनेक भारतीय हे बेकायदेशीर मार्गांनेच अमेरिकेत जात आहेत. अमेरिकेत गेलेल्या एका तरुणाच्या आजोबांनी सांगितले की, माझा नातू फक्त 15 दिवसांपूर्वीच अमेरिकेला गेला होता. मी त्याला अमेरिकेला पाठवायला तयार नव्हतो. मला माहित नाही की त्याचे काय बिघडले आणि त्याला पाठविण्यासाठी किती पैसे खर्च झाले. तर, एका व्यक्तीने सांगितले की त्याचा एक नातेवाईक महिन्याभरापूर्वीच अमेरिकेला गेला होता. तो तिथे बस ड्रायव्हर म्हणून नोकरी करत होता. त्याला दोन मुले आहेत. अमेरिकेला जाण्यासाठी त्याने 30 लाख रुपये खर्च केले, पण त्याला आता परत पाठविण्यात आले आहे.
अमेरिकेने परत पाठविलेल्या भारतीयांमध्ये पंजाबमधील 30, हरियाणा आणि गुजरातमधील प्रत्येकी 33 लोकांचा समावेश आहे. याशिवाय उत्तर प्रदेश आणि चंदीगडमधील प्रत्येकी दोन आणि महाराष्ट्रातील तीन जण आहेत. या सर्वांनीच अमरिकेत जाण्यासाठी तब्बल 30 ते 50 लाख रुपये खर्च केले होते. त्यामुळे आता पुन्हा भारतात आल्यानंतर इतके कर्ज कसे काय फेडायचे ? असा प्रश्न निर्माण झाला आहे.
* 10 वर्षांचे मूल पदरात, 1 कोटींचे कर्ज काढून अमेरिकेत :-
अवैध पद्धतीने अमेरिकेत गेलेल्या आणि तेथून भारतात परत आलेल्या अनेकांच्या कहाण्या आता समोर येत आहेत. काही माध्यमांनी याबाबतची वृत्ते दिली आहेत. 2 जानेवारी रोजी लवप्रीत कौर यांनी आपल्या 10 वर्षाच्या लहान मुलासह पंजाबहून युनायटेड स्टेट्सचा प्रवास सुरू केला. अमेरिकेत पोहोचण्यासाठी लवप्रीत कौर यांनी एजंटला जवळपास 1 कोटी रुपये दिले होते. आम्हाला अमेरिकेत पोहचण्यासाठी डंकी मार्गांद्वारे अनेक देशांतून प्रवास करावा लागला. एजंटने आम्हाला सांगितले होते की, तो आम्हाला थेट अमेरिकेत घेऊन जाईल. परंतु, आम्हाला खूपच अनपेक्षित अनुभव आला. लवप्रीत कौर यांना हे सांगताना अश्रू अनावर झाले.
* कसे पोहोचले अमेरिकेत, कसा होता मार्ग ? :-
आम्हाला आधी कोलंबियाच्या मेडेलिन येथे विमानाने नेण्यात आले. तिथे आम्ही दोन आठवडे मुक्काम केला. नंतर पुन्हा विमानाने सॅन साल्वाडोर येथे नेण्यात आले. तिथून आम्ही ३ तासांहून अधिक काळ चालत चालत ग्वाटेमलाला गेलो. तिथून टॅक्सीने मेक्सिकन सीमेवर पोहोचलो. मेक्सिकोत 2 दिवस राहिल्यानंतर अखेर 27 जानेवारी रोजी आम्ही अमेरिकेत पोहोचलो, असे लवप्रीत कौर यांनी सांगितले. अमेरिकेची सीमा ओलांडताच अमेरिकन अधिकाऱ्यांनी लवप्रीत कौर आणि त्यांच्याबरोबर असलेल्या लोकांना ताब्यात घेतले.
* एजंटला 50 लाख दिले अन् :-
पाचपावली पोलिस स्टेशनमध्ये हरप्रीतला चौकशीसाठी बोलाविण्यात आले होते. या चौकशीदरम्यान हरप्रीत बेकायदेशीररित्या अमेरिकेत कसे पोहचले याची माहिती समोर आली आहे. हरप्रीत सिंह ललियाचा नागपुरात ट्रान्सपोर्टचा व्यवसाय होता. मात्र, 5 डिसेंबर 2024 रोजी हरप्रीत सिंह अबुधाबी मार्गे कॅनडाला जाण्यासाठी दिल्लीतून निघाला. एजंटच्या माध्यमातूनच त्याने कॅनडाचा व्हिजा काढला होता. मात्र त्याला अबुधाबी विमानतळावर थांबविण्यात आले आणि त्याला कॅनडाच्या विमानात बसू देण्यात आले नाही. विमान कंपनीने त्याला पुन्हा दिल्लीला पाठवले.
हरप्रीत सिंह ललियाने डंकी मार्गांने कॅनडाला जाण्यासाठी एजंटला दोन टप्प्यांमध्ये सुमारे 50 लाख रुपये दिले होते. पहिल्यांदा 18 लाख रुपये भारतात देण्यात आले. दुसऱ्या टप्प्यातले सुमारे 31 लाख 50 हजार रुपये हरमासिलोमध्ये घेण्यात आले. गुरुवारी पहाटे नागपूर आल्यानंतर हरप्रीतला नागपूर पोलिसांनी पाचपावली पोलिस स्टेशनमध्ये चौकशीसाठी बोलावले होते. बुधवारी अमृतसरमध्ये आणि त्यानंतर मुंबईमध्ये ही सेंट्रल एजेंसीसने हरप्रीतची चौकशी केली होती.